Լոնդոնի հարավ-արևմուտքում, Վուլիչյան զորանոցների մոտակայքում մաչետեով և մսագործի դանակով զինված երկու տղամարդ, գոռալով «Ալլահ Աքբար», հարձակվել են մի պատահական անցորդի վրա և դաժանաբար սպանել:

Հանցագործությունը կատարելուց հետո, նրանք զոհի մարմինը քարշ են տվել և գցել զորանոցի մոտ և գրեթե 20 րոպե սպասել, մինչև ոստիկանությունը կժամանի: Ոստիկանությունը դեպքի վայր ժամանելով և հանցագործների մոտ զենք լինելու մասին նախնական տեղեկատվությամբ առաջնորդվելով ՝ անմիջապես կրակ է բացել նրանց ուղղությամբ:

Երկու հարձակվողներն էլ վիրավորվել են: Նրանց ձերբակալել և տեղափոխել են հիվանդանոց:

Ոստիկանությունն այս դեպքը դիտարկում է որպես ահաբեկչություն, նշում է «BBC»-ն:

Մեծ Բրիտանիայի վարչապետ Դեվիդ Քեմերոնը դեպքի կապակցությամբ ընդհատել է իր այցը Ֆրանսիա և վերադարձել Լոնդոն: «Կան այն բանի մասին լուրջ ցուցումներ, որ իրականցվել է ահաբեկչություն» նշել է Դ. Քեմերոնը և ավելացրել, որ Բրիտանիան «երբեք չի խոնարհվի այսպիսի հարձակումների առջև»:

Այսօր նրա ղեկավարությամբ Լոնդոնում կհրավիրվի Արտակարգ իրավիճակների կոմիտեի (COBRA) նիստ:

Լոնդոնի բոլոր զորանոցներում ուժեղացվել է անվտանգության հսկողությունը:

Նշենք, որ Բրիտանիայի մայրաքաղաքում այդպիսի 10 զորանոց կա: