Սեռադաստիարակությունը մարդու դաստիարակության մի մասն է կազմում և, եթե ընդհանուր դաստիարակության մեջ որևէ մաս բացակայում է, նշանակում է այն թերի է, նման կարծիք այսօր լրագրողների հետ հանդիպման ժամանակ հայտնեց սեքսապաթոլոգ, հոգեթերապևտ Մարատ Զաքարյանը՝ նշելով, որ սեռական դաստիարակությունը պետք է սկսել ամենավաղ տարիքից:

«Տարբեր տարիքային փուլեր իրենց սեռական դաստիարակության յուրահատկությունները պետք է ունենան, բայց ամենապատասխանատու շրջանը սեռական հասունության շրջանն է: Պատասխանատու է, քանի որ հոգեբանական, սեռական և ֆիզիոլոգիական փոփոխություններ են տեղի ունենում պատանիների մոտ»,- ասաց նա: 

Ասուլիսին ներկա մեկ այլ սեքսոպաթոլոգ, բժիշկ Ռուզաննա Ազատյանը ևս նշեց, որ մի շրջանում երեխան սեռական դաստիարակություն ստանում է ծնողներից, մեկ այլ շրջանում՝ դպրոցից ու բակից:

«Մենք՝ սեքսապաթոլոգներս, պատրաստել ենք կայք, որը տարրական տեղեկատվություն է պարունակում մարդու օրգանիզմի մասին: Այստեղ մարդը կարող է գտնել իրեն հուզող մի շարք խնդիրների պատասխաններ»,- ասաց նա:

Մարատ Զաքարյանը նշեց, որ ինքը հանդիպում է կանանց ու տղամարդկանց, ովքեր ինչ-որ բան կարդացել են այս խնդիրների մասին և իրենց թյուր գիտելիքներով կանգնել լուրջ իրավիճակների առաջ:

«Այդ կիսատ-պռատ գիտելիքները հաճախ շատ ավելի բարդ իրավիճակում են հայտնվում: Դեռահասները չգիտեն, թե ինչ խնդիրների առաջ կարող են իրենց կանգնեցնել սեռավարակները: Հաճախ մինչև ամուսնանալը սեռական հարաբերություններ են ունենում և սեռական հարաբերություններ ունենալիս չեն պաշտպանվում, ինչն էլ սեռավարակներով հիվանդանալու պատճառ է դառնում»,- տեղեկացրեց Մարատ Զաքարյանը: