Սամվելը և Մարիամը այն զույգերից էին, ովքեր կարճ ժամանակ ընկերություն անելուց հետո հասկացան, որ ստեղծվել են միմյանց համար և որոշեցին ամուսնանալ:

Ամուսնության առաջին երկու տարին շատ երջանիկ էին, ապրում էին Սամվելի ծնողների հետ: Մարիամի հարաբերություններն էլ նրա ծնողների հետ սկզբնական շրջանում շատ ջերմ էին, սիրելով ամուսնուն` նա շատ էր հարգում և սիրում նրա ծնողներին:

Առաջին հայացից թվում էր, թե ամեն ինչ շատ լավ է, նրանք շատ երջանիկ են, բայց ներքուստ կար մտահոգություն: Ժամանակն անցնում էր, իսկ Մարիամը չէր կարողանում հղիանալ, ինչն էլ զույգի համար լուրջ մտահոգության առիթ էր հանդիսանում, չէ՞ որ նրանք մինչ ամուսնությունը երազում էին փոքրիկների մասին, նույնիսկ անուններ էին որոշել իրենց զավակների համար:

Այս խնդիրը քննարկման առարկա դարձավ նաև Սամվելի ծնողների համար, վերջիններս առիթը բաց չէին թողնում իրենց հարսին նեղացնել և ասել, որ վերջինս չի կարողանում իրենց որդուն զավակ պարգևել:

Մարիամը սկսեց ավելի հաճախակի բժշկի այցելել: Սակայն բժշկական եզրակացությունները ամեն անգամ ցույց էին տալիս, որ նա առողջական ոչ մի խնդիրներ չունի և կարող է մայրանալ: Մարիամը մի անգամ ամուսնուն առաջարկեց, որպեսզի ինքը ստուգման գնա` մտածելով, որ շատ հնարավոր է, որ ամուսինը առողջական խնդիրներ ունի...

Բայց ավաղ, Մարիամի նման առաջարկությունը շատ զայրացրեց սկեսրոջը, ով հանդգնեց և ասաց, որ իր որդին կարող է հայր դառնալ, իսկ ահա Մարիամը` դժվար թե:

Նրա այդ արտահայտությունը շատ նեղացրեց Մարիամին, վերջինս սկսեց ավելի շատ տառապել, ամուսնու բացակայության ժամանակ նա և սկեսուրը ավելի հաճախակի էին վիճում: Մի օր Մարիամը նախընտրեց հեռանալ տանից:

Սամվելը Մարիամին երկար ժամանակ համոզում էր, որպեսզի նա ետ վերադառնա, սակայն վերջինս հրաժարվում է վերադառնալ այն տուն, որտեղ իրեն նվաստացնում են:

Սիրելով կնոջը` Սամվելը չէր կարող նրան թողնել, և որոշեցին հեռանալ երկրից: Իմանալով, որ արտերկրում կան համապատասխան մասնագետներ` Սամվելը և կինը բնակություն հաստատեցին Բելգիայում, որտեղ մի քանի ամիս բուժման կուրս անցնելուց հետո Մարիամը հղիացավ և որդի լույս աշխարհ բերեց:

Ուրախալի լուրը լսելուն պես, Սամվելի ծնողները զղջացին Մարիամին վիրավորանքներ հասցնելու համար և խնդրեցին, որպեսզի նրանք ետ վերադառնան:

Հարգելով ծնողների խոսքը Սամվելը` կնոջ և փոքրիկ Մարկի հետ Երևան տեղափոխվեցին: