Մեզանից շատերն աշնանը եւ ձմռանը չեն հետեւում սննդակարգին, իսկ տաք եղանակին հայտնաբերում են, որ ավելորդ քաշ են հավաքել: NEWS.am STYLE-ը դիմել է ֆիթնեսի մասնագետՆազենիին՝ անթերի կազմվածքի գաղտնիքներն իմանալու համար:

«Շատ կանայք բավարար ժամանակ չունեն ամեն առավոտ հատուկ վարժություններ անելու համար: Սակայն գոյություն ունի, այսպես կոչված, անտեսանելի մարմնամարզություն: Այն կարելի է անել ինչպես աշխատավայրում, այնպես էլ հեռուստացույցի առջեւ նստած:

Նախ հարկավոր է ձգել փորը եւ հնարավորինս երկար պահել այդ վիճակում: Եթե կանոնավոր կերպով կատարեք այդ վարժությունը՝ օրական 10-15 անգամ, որոշ ժամանակ անց կնկատեք, որ փորի մկաններն ավելի ձիգ են դարձել:

Այնուհետեւ մերսում ենք փորն աջից ձախ, հետո՝ հակառակ ուղղությամբ: Ձեռքերի շարժումները փոխում ենք ժամացույցի սլաքի ուղղությամբ: Այս վարժությունը նպաստում է որովայնի շրջանում արյան շրջանառությանը եւ օգնում ձգել այն:

Իսկ եթե ցանկանում եք տեսանելի արդյունքի հասնել կարճ ժամանակում, ապա, բացի անտեսանելի մարմնամարզությունից, պետք է իսկական վարժություններ կատարեք, ինչպես, օրինակ, սեղմում վարժությունը: Պառկեք հատակին, ձեռքերը դրեք ծոծրակին: Շնչելիս իրանը բարձրացրեք, արտաշնչելիս՝ իջեցրեք: Այս վարժությունն արեք օրական 30-40 անգամ»:

NEWS.am STYLE