Եղունգների շերտավորումը խնդիր է բազմաթիվ կանանց համար: Այս տհաճության հետեւանքով եղունգները չափազանց տգեղ տեսք են ունենում, իսկ դրանց տիրուհին անընդհատ ամաչում է իր ձեռքերից: NEWS.am STYLE-ի դիմել է մատնահարդարման մասնագետ ԱնահիտՍիմոնյանին՝ խնդրելով մի քանի խորհուրդ տալ այդ թեմայով.

«Նախ հարկավոր է հասկանալ պատճառները: Ամենից հաճախ մեղավորն օրգանիզմում հանքանյութերի եւ վիտամինների, հատկապես կալցիումի պակասն է: Իրականում, այսօր հնարավո՞ր է ստանալ կալցիումի օրական չափաբաժինը, եթե անգամ կաթն ու թթվասերը փոշուց են պատրաստվում: Բացի այդ, եղունգները կարող են շերտավորվել, եթե մանիկյուրն անհամապատասխան գործիքներով եք անում:

Սակայն խնդիրը լուծել հնարավոր է: Եղունգների շերտավորումից կարելի է ազատվել աղային վաննաների օգնությամբ: Ձեզ անհրաժեշտ է սովորական ծովի աղ՝ առանց ժամանակակից բուրավետ հավելումների: Մեկ թեյի գդալ աղը լուծեք տաք ջրի մեջ եւ ձեռքերը 20 րոպե պահեք դրանում: Այս գործողությունը կատարեք 10 օր անընդմեջ: Մեկ ամիս անց կարող եք նորից կրկնել: Իսկ հետո կանխարգելման նպատակով կարելի է եղունգների համար նման վաննաներ պատրաստել շաբաթը մեկ անգամ:

Իսկ սոդայով վաննաները կտրականապես խորհուրդ չեն տրվում: Երբեմն այդ միջոցին դիմում են, որպեսզի հեռացնեն եղունգների տակ խորը հավաքված կեղտը: Բայց այդ դեպքում եղունգները պարզապես «բամբակե» են դառնում, այնպես որ սոդա գործածելն արգելվում է»:

NEWS.am STYLE