Ոչ բոլոր կանայք կարող են պարծենալ կատարյալ երկար վարսերով: Բայց տարբերվելու ցանկություն ենթագիտակցորեն ունի յուրաքանչյուրը. երեկ՝ կարճ կտրվածք, այսօր՝ երկար վարսեր: Շրջապատին հաճելիորեն ցնցելու միջոց է… Բայց մազերն աճեցնելու գաղափարին հետեւում են բազմաթիվ հարցեր, այդ թվում՝ թե ինչպես այդ ճիշտ անել: NEWS.am STYLE-ը վարսահարդար Անահիտ Սարգսյանին խնդրել է պատմել վարսերի աճեցման գործողության մասին:

«Ամենաժամանակակից միջոցը վարսերի պատիճային աճեցման տեխնոլոգիան է: Երկար ժամանակ կերատինային պատիճներով մազափնջերի արտադրողը իտալական SoCap ընկերությունն էր, ինչի արդյունքում այս միջոցը դեռեւս անվանում են իտալական:

Մեթոդի իմաստը բարձր ջերմաստիճանի ազդեցությամբ կերատինի պատիճներով վարսերի աճեցումն է: Մազարմատներից մեկ սանտիմետր վերեւ ամրացնում են դոնորական վարսերի բնական փունջ, որի ծայրերին կերատինի պատիճներ են: Բարձր ջերմաստիճանի դեպքում պատիճը զոդվում է «բնական» մազին: Հատուկ գործիքների օգնությամբ վարսահարդարը պատիճներին թաղանթի կամ մխոցի տեսք է տալիս: Դրանք այնքան փոքր են, որ միակցման տեղը գրեթե անհնար է տեսնել: Սովորաբար պատիճներով վարսերի աճեցման համար օգտագործում են մինչեւ 150 փունջ՝ կախված հաճախորդի մազերի տեսակից եւ քանակությունից:

Վարսերի պատիճային աճեցման առավելությունները.

1. Վարսերի պատիճային աճեցման գործողությունը քիչ ժամանակ չի խլում (սկսած 3 ժամից), բայց փոխհատուցվում է կայուն սանրվածքով: Աճեցված վարսերը ձեզ կծառայեն 6-9 ամիս: Եթե ժամկետայնությամբ պատիճային աճեցումը համեմատենք ժապավենայինի հետ, առաջին մեթոդի եռակի առավելություն կստանանք:

2. Վարսերը ժապավենային մեթոդով աճեցնելու համար գործողության համար ընդամենը մեկ ժամ կծախսեք: Փոխարենը պատիճային աճեցման դեպքում կարող եք ցանկացած սանրվածք անել, այն դեպքում, երբ ժապավենային աճեցումը բացառում է նման հնարավորությունը:

3. Եվս մեկ առավելություն. մազերի խնամքի պարզությունը: Պատիճային աճեցման դեպքում մազերի խնամքը գրեթե չի տարբերվում առօրյա խնամքից: Հարմար են նույն շամպունը, դիմակները, բալզամը, ինչ մինչեւ աճեցումը: Ավելին, մազերի շերտավոր եւ սովորական ներկումը նույնն է, ինչ սովորական վարսերի դեպքում:

4. Աճեցումից հետո մազերի վերականգնումը հատուկ ջանքեր չի պահանջում, եթե պահպանված են խնամքի բոլոր միջոցները, փնջերի ամրացման ու դրանք ժամանակին հեռացնելու կանոնները: Պատիճները հանելուց հետո վարսերի դյուրաբեկության դեպքում հարկավոր է օգտագործել մազերի հագեցած դիմակներ կամ քսուքներ:

Անկասկած, սա մազերը երկարեցնելու ամենից էժան տարբերակը չէ, բայց սանրվածքը, որ ձեզ կնվիրի վարսերի պատիճերով աճեցումը, ձեզ ավելի կանացի եւ գեղեցիկ կդարձնի»,- պատմեց Անահիտը:

Ցավոք, նման գործողությունն էժան չէ: Միջին արժեքը 30-40 հազար դրամ է:

NEWS.am STYLE