«Ժողովուրդ» թերթի ուշադրության կենտրոնում են վերջին օրերին Կոտայքում և Արմավիրում տեղի ունեցած աղմկահարույց դեպքերը:

Թերթը հիշեցնում է, որ Կոտայքի մարզի Քաղս գյուղի 81-ամյա բնակիչ Սոս Գրիգորյանը կտրել էր կնոջ` 79-ամյա Տորիկ Գրիգորյանի նախաբազկի զարկերակը: Պատճառները թղթակիցը փորձել է պարզել Ս.Գրիգորյանի հարսից` Հռիփսիմեից, ով պատմել է, որ սկեսրայրը շատ լուրջ սթրեսային վիճակում է եղել, նրա ոտքն արդեն 4 տարի է կտրված է: Այդ իսկ պատճառով նա շատ դեղեր է օգտագործում ու շատ նյարդային է դարձել:

Թերթի տեղեկացմամբ` պարզվում է, որ Սոս Գրկգորյանի հիվանդության պատճառը եղել է հարազատ դստեր մահը:

Հարսի ներկայացմամբ` վաղ առավոտյան Ս.Գրիգորյանը գնացել է կնոջ ննջասենյակ. կնոջը խնդրել, որ դեղերը տա: Ինչքան ձայն է տվել կնոջը, չի պատասխանել, քանի որ կինը շատ վատ է լսում և, ինչպես ասել է Հռիփսիմեն, երևի պահի ազդեցության տակ նա գնացել է այդ քայլին:

«Եթե Կոտայքի մարզում տեղի ունեցած միջադեպը, ինչպես հարազատներն են ներկայացնում, սթրեսային վիճակի հետևանք է, ապա Արմավիրի մարզի Հացիկ գյուղում տեղի ունեցած դաժան սպանության հեղինակին հարազատները, իրենց խոսքով, չեն ուզում ճանաչել»,- գրում է թերթը :

Կատարվածի վերաբերյալ թերթը զրուցել է Հացիկի գյուղապետ Արթուր Եղիազարյանի հետ, ով իր խոսքում նշել է, որ Վարդանը, ով մարմնական վնասվածքներ է հասցրել մորը, ալկոհոլի նկատմամբ սեր է ունեցել և տան անդամների հետ մշտապես կռիվների մեջ է եղել: Դեպքի օրն էլ հարբած է եղել: Իսկ դրանից մի քանի օր առաջ վարդանի կինը երեխաների հետ հեռացել է տանից:

Թերթը նշում է, որ երեկ Վարդանի հարազատները, գյուղապետը և իրավապահները գյուղի դաշտերում փնտրել են Վարդանին, որը մորը ծեծելուց հետո դիմել է փախուստի:

«Ժողովուրդ»-ը ոստիկանության հասարակայնության հետ կապերի և լրատվության վարչությունից տեղեկացել է, որ հարուցվել է քրեական գործ` ՀՀ քրեական օրենսգրքի 112-րդ հոդվածի 2-րդ մասի 14-րդ կետով: Ձեռնարկվում են միջոցառումներ` Վ.Ստեփանյանին հայտնաբերելու ուղղությամբ :

Հոդվածն ամբողջությամբ կարդացեք «Ժողովուրդ» օրաթերթի` 31.07.2013թ. համարում: