Գրո՛ղը տանի, մայրի՛կ, հեռացրո՛ւ այդ մոմակալն իմ տեսադաշտից...Երևի արդեն մտածեցիր, որ սա մի դրվագ է բրազիլական սերիալից, երանի թե...

Անդրադարձը Գայանե Ասրյանի

Հոգեբան՝ Տաթևիկ Աղաբեկյան

Այնքա՜ն գեղեցիկ սիրավեպ էր, խոստումնալից ու ազնիվ հարաբերություններ, որ երբևէ մտքովդ չէր անցնի, որ մի օր նրա մասին հիշեցնող իրերը քեզ այդպես զզվելի կթվան, և ամեն կերպ կցանկանաս ազատվել դրանցից:

Մի քիչ խոսենք նրա նվերների նշանակության մասին

Հարաբերությունների ընթացքում ձևավորվում է կապվածություն, որն ամրապնդելու համար զույգը հարաբերությունների ընթացքում ստեղծում է կապվածության օբյեկտներ, այս դեպքում` զուգընկերոջը փոխարինող օբյեկտներ, առարկաներ ու ռիտուալային գործողություններ: Նվերների հիմնական նպատակը զուգընկերոջ բացակայության դեպքում իր գոյության մասին հիշացնելն է, ինչն էլ տվյալ մարդուն ավելի ապահով ու հանգիստ է դարձնում: Ավելի պարզ ասած՝ նվերները հիշեցնում են մեզ մեր սիրած մարդուն և ուժեղացնում կապը նրա հետ:

«Մենք ունեինք մեր անվան առաջին տառերով և մեր սիրած թվերով մի քանի իրեր, որոնք շատ սիրված էին երկուսիս կողմից և համարվում էին մեր կյանքի անբաժանելի մասը: Չնայած նրա կինը, երբեմն շատ լավ իմանալով դրանց նախապատմությունը, խեթ հայացքով նայում է ամուսնուն, երբ Կարենը մի քիչ երկար է կենտրոնանում դրանց վրա, բայց միևնույնն է` տարիներ անց այդ իրերը շարունակում են հիշեցնել գեղեցիկ անցյալը (մոտ ընկերուհիս կապ ունի նրանց հետ, ծիծաղում է...)»:

Նելի, 29 տ.

«Նվեր ընտելիս ամեն կերպ ուզում եմ ցույց տալ իմ նվիրումն ու սերն Անիի հանդեպ, բայց միշտ պարզվում է, որ նա այդքան էլ ոգևորված չէ իմ նվերով: Անկեղծ ասած, ամեն անգամ անհարմար եմ զգում, բայց հետո երջանկանում եմ «լավ գժոս, ոչինչ, կարևորը նվերը չէ, այլ...» արտահայտությունը լսելիս»:

Արտակ, 30 տ.

Ի՞նչու ենք ուզում բաժանումից հետո նրա նվերները դուրս նետել լուսամուտից ուղիղ փողոց:

Բաժանման սկզբական շրջանում դեռ կրքերը թեժ են, հարցականները շատ, հիսաթափությունը խորը: Ուզում ես դեն նետել այն ամենը, ինչ հիշեցնում է նրան, այս կերպ կարծում ես՝ կթեթևանան նյարդերդ, հրաժեշտ կտաս անցյալիդ: Մինչդեռ երբ ժամանակն անցնում է և դու հանդարտվում ես, հասկանում ես, որ, նվերները դեն նետելով, դու պարզապես խաբում ես քեզ:

«Նվերներից հրաժարվելը կամ առավել ևս հետ վերադարձնելը կարծում եմ առնվազն քաղաքակիրթ չէ: Ես իմ երեք ընկերուհիների համար էլ թանկարժեք նվերներ առել եմ, ի վերջո, դա ինձ հաճելի է եղել: Բաժանումից հետո ավելի խորը ցավ եմ ապրել, երբ նրանք ակնարկել են նվերները վերադարձնելու մասին ...»:

Տիգրան, 28 տ.

«Ես իմ երկու նախկին ընկերների նվերների երկու տարբեր անկյուն ունեմ իմ սենյակում: Ես այդ իրերն օգտագործում եմ սիրով և միշտ լավ հիացմունքով եմ հիշում այն օրերը, երբ այս կամ այն իրը նվեր եմ ստացել»:

Աստղիկ, 23 տ.

Անհեթեթ է զույգի միջև չստացված հարաբերությունների արդյունքում նվերներից հրաժարումը: Անկախ քո վերջնական որոշումից՝ բաժանվել ընդմիշտ, թե նորից վերսկել հարաբերությունները, դու պետք է հարգանքով վերաբերվես նրա նվերներին և ձեր անցյալին: Չէ՞ որ այդ նվերները սիրո, երջանկության աննկարգրելի պահեր են պարգևել քեզ:

Պահեք նրա նվերները, դրա համար չեք զղջա...

Եթե հարաբերությունները վերջացել են հանգիստ, արդյունքում դուք երկուսդ էլ ձեր նախկին հարաբերությունները հիշում եք ժպիտով ու զգացմունքներ այլևս չկան, ուրեմն նվերները կարելի է պահել: Եթե բաժանումից հետո կա վիրավորանք, ցավ կամ զգացմունքներ, ուրեմն նվերները պարտադիր չէ դեն նետել, ուղղակի պետք է որոշ ժամանակով պահել աչքից հեռու և դուրս հանել միայն այն ժամանակ, երբ չկան ոչ մի տեսակի զգացմունքներ, իսկ անցած հարաբերությունները լավ հուշեր են միայն արթնացնում:

«Նրա նվիրած արջուկն արդեն 6 տարի է ինձ հետ է. ես նրան անգամ նախկին ընկերոջս անունով եմ դիմում: Մեր բաժանումից հետո քույրիկիս խնդրել էի տնից հեռացնել նրա նվերները: Մեկ տարի անց նա ինձ տվեց միայն արջուկը, երջանկությունից աչքերս լցվել էին, շատ ուրախ էի, որ իմ պատանեկությունից իր ունեմ, որը լավ հիշողություններ է առաջացնում»:

cosmo.am