Ավտովթարը տեղի է ունեցել շաբաթ առավոտյան` Ռյազանի շրջադարձին: Մոսկովյան պետհամարանիշներով սեւ «Աուդի 7»-ը բախվել է  էլեկտրահաղորդալարերի հենասյանը: Վարորդից` 25-ամյա Գրիգորի Չալաբյանից բացի մեքենայում նրա երկու ընկերներն են եղել`  Հովհաննեսը եւ Էդգարը, նաեւ` երկու աղջիկներ: Գրիգորին նրանց տուն էր հասցնելու...

«Ամենայն հավանականությամբ, վարորդը պարզապես կորցրել է մեքենայի կառավարումը: Ճանապարհի այդ հատվածում կտրուկ շրջադարձ է: Հարվածն ուժեղ է եղել, ուղեւորներից մեկը տեղում մահացել է: Մյուսը մահացել է շտապօգնության մեքենայում: Երկու աղջիկները ծայրահեղ ծանր վիճակում են: Երբ վարորդը դուրս է պրծել մեքենայից եւ մետաղակույտի մեջ տեսել ընկերների մարմինները, տրավմատիկ ատրճանակով կրակել է իր գլխին», - ասել են շրջանային ՃՈ-ում, հաղորդում է «Կոմսոմոլսկայա պրավդան»:

«Դուստրս վաղուց էր ճանաչում տղաներին: Այդ տղաները առաքինի մարդիկ էին, վթարը ճակատագրական հանգամանքների բերումով է եղել», - ասել է տուժածներից մեկի մայրը:

«Ես զարմացած չեմ Գրիշայի արարքից: Նա փաստացի որբ է մեծացել: Ավելի քան տասը տարի առաջ ինչ-որ տականքներ Ռյազանում սպանել էին նրա ամբողջ ընտանիքին` մորը, հորը, երկու եղբայրներին եւ մորաքրոջը: Հայրը խոշոր գործարար էր: Ուղղորդված կողոպտիչները ներխուժել են տուն եւ բոլորին սպանել: 12-ամյա Գրիշան այդ ժամանակ Բուլղարիայում է եղել, ինչն էլ փրկել է նրա կյանքը»,- պատմել է նրա ծանոթներից մեկը:

Դեռ դպրոցում Գրիգորին ընկերացել էր Հովհաննեսի եւ Էդգարի հետ:

.«Ընկերներ չեն, այլ եղբայրներ» - նրանց մասին ասում էին ճանաչողները: Նույնիսկ Մոսկվա` տատիկի մոտ տեղափոխվելուց հետո Գրիգորին մշտապես կապի մեջ էր տղաների հետ:

Գրիշայի ընկերների խոսքով`  հարազատ մարդկանց կորստից հետո նա պարզապես չէր կարող ապրել այն գիտակցումով, որ ինքն է ուրիշների մահվան պատճառ դարձել: Ներկայումս ՌԴ Ռյազանի շրջանի ՔԿ քննիչները երեք մարդու մահվան փաստի առիթով նախաքննական ստուգում են անցկացնում:

NEWS.am-ը հաղորդել էր, որ Ռուսաստանի Ռյազանի մարզում տեղի ունեցած ավտովթարի հետեւանքով երկու մարդ էին մահացել, եւս մեկը վիրավորվել էր: Ավտովթարի մեղավորը, հասկանալով, որ այլոց մահվան պատճառ է դարձել, հենց դեպքի վայրում ինքնասպան էր եղել:

Ողբերգությունը տեղի է ունեցել հոկտեմբերի 13-ին՝ Սիտնիկովսկայա փողոցում: Ճանապարհային ոստիկանության տվյալներով, Audi մակնիշի մեքենայի 25-ամյա վարորդը, չի կարողացել կառավարել մեքենան եւ բախվել է էլեկտրասյանը: Հարվածի արդյունքում մեքենան բառացի մասերի է բաժանվել:

Մեքենայի սրահում բացի վարորդից եղել են երիտասարդներ՝ երկու տղա եւ երկու աղջիկ: Ծանր վնասվածքներով նրանք տեղափոխվել են հիվանդանոց: 24-ամյա երիտասարդը տեղում զոհվել է, մյուս տղան մահացել է արդեն հիվանդանոցում:

Ինչպես հաղորդում է «Գոլոս Ռոսիին», ավտոմեքենայի վարորդը վթարից հետո ինքնասպանություն էր գործել՝ տրավմատիկ ատրճանակից կրակելով իր գլխին: