Որքան էլ տղամարդը կնոջը մեղադրի խանութում ցուցաբերած դանդաղկոտության մեջ, որտեղ ներկայացված հազարավոր անուն ապրանքից պետք է ընտրել մեկը, կինն արագաշարժ չի դառնում։ Եթե բացառենք, իհարկե, տարբերակը, թե՝ «իսկ սա… միեւնույնն է ոչինչ չի հասկացվում, կվերցնեմ կարմիր փաթեթը»: Թե ինչ օճառ է լինում եւ ինչպես ընտրել մաշկին կատարյալ համապատասխանող օճառ, NEWS.am STYLE-ի թղթակցին պատմել է Օճառի սրահի տնօրեն, գլխավոր օճառագործ ու վաճառողուհի Մարիա Բաղդասարովան.

«Լավ օճառի մեջ բնական յուղեր կան։ Իսկ ամեն յուղ ուրույն ձեւով է օգտակար ինչպես դեմքի, այնպես էլ մարմնի մաշկին. մեկը թարմացնում է, մյուսը՝ սնում, երրորդը` ձգում: Այդ պատճառով էլ խորհուրդ եմ տալիս պարբերաբար փոխել օճառը, որպեսզի մաշկը լիարժեք խնամք ստանա։ Բնական յուղերով օճառ ընտրելիս կողմնորոշվեք առաջին հերթին այս կամ այն արտադրանքների հանդեպ ալերգիայի առկայությամբ կամ բացակայությամբ: Երկրորդ` անպայման հաշվի առեք ձեր մաշկի տեսակը: Չոր մաշկին հարմար են ավոկադոյի, դեղձի, խաղողի կորիզների, ժոժոբայի կամ քաղցր նուշի յուղ պարունակող օճառները: Յուղոտ կամ նորմալ մաշկի համար խորհուրդ եմ տալիս չիչխանի, կարիտեի յուղով ու մեղրով օճառներ ընտրել: Սակայն, միշտ իմացեք, որ մաշկին կատարյալ համապատասխան օճառ ընտրելու համար ավելի լավ է խորհրդակցել մասնագետների հետ: Այդ առումով ձեռագործ օճառը եւս մեկ առավելությունի ունի. փորձառու օճառագործի համար ձեր մաշկին կատարյալ համապատասխանող օճառ ընտրելը դժվարություն չի առաջացնի»: