Մեր հայրենակիցներից շատերը նախընտրում են ամառային արձակուրդն անցկացնել քաղաքից դուրս գնալով, հանգստյան գոտիներում կամ Հայաստանի պատմական վայրերն ու եկեղեցիներն այցելելով: Դե էլ ինչ հանգիստ, առանց ընկերների ու քեֆի: Լավ կլիներ, սակայն, որ այս լավ տրամադրությունը պահպանվեր մինչև վերջ, բայց…ոչ բոլորն են կերուխումից հետո հիշում խորովածի ոսկորները, ձմերուկի կեղևներն ու մնացած աղբը հավաքելու, մաքրելու, հետո նոր հեռանալու մասին: Առավել մտահոգիչ է, երբ աղբակույտերը նկատվում են պատմական վայրերի ու եկեղեցիների (Գառնի, Գեղարդ, Նորավանք, Տաթևի վանք և այլն) շրջակայքում:

Զարմանալի երևույթ է ու նաև ազգային առանձնահատկություն, որ հայերս ավելի շատ սիրում ենք նկատողություն անել, քան հետևել դրան:

Կամ, օրինակ, կարդալով ամենուր դրված ''Պահպանել մաքրություն'' վահանակները, դրանց կողքին տեղադրված աղբամանները, մարդիկ շարունակում են աղբ նետել այնտեղ, որտեղ իրենց է հարմար: Ու ցավալին այն է, որ շատ հաճախ այդ ամենին ականատես են լինում օտարերկրացի զբոսաշրջիկները:

Թեև պատմական վայրերի տարածքները մաքրվում են Բնապահպանության նախարարության նախաձեռնած տարբեր ծրագրերի շնորհիվ, միևնույն է, երևույթը շարունակական է: Նախարարության մամուլի քարտուղար Հասմիկ Մկրտչյանը ՄԱՄՈՒԼ.am լրատվականի թղթակցի հետ զրույցում ասել է. ''Մեր աշխատակիցներն անընդհատ շրջում են այդ տարածքներով, ամենուր դրված են աղբամաններ: ''Մաքուր հայրենիք'' նախագծի շրջանակներում իրականացվում են մաքրման աշխատանքներ, որոնց մասնակցում են թե բնապահպանության նախարարության աշխատակիցները, թե կամավորներ տարբեր ՀԿ-ներից ու նաև դպրոցականներ'':

Անկախ ամեն ինչից` կիրականացվի մաքրման այս կամ այն ծրագիրը, թե ոչ, յուրաքանչյուրն ինքը պետք է մտածի շրջակա միջավայրը չաղտոտելու մասին: Այնպես որ, պետք չէ սպասել որևէ բնապահպանական ծրագրի` ''մաքրության'' մշակույթը մեր մեջ դաստիարակելու համար:

mamul.am