Չհաջողված տատուի նկարը մասնագետները հետագայում կարող են շտկել։ Իսկ ոչ ստերիլ պայմաններում դաջվածք անելուց կարելի է կորցնել առողջությունը։ Ո՞ր դեպքում է հակացուցված դաջվածքը և ինչպիսի՞ խնամք է այն պահանջում... Այս եւ շատ այլ հարցերիպատասխանը NEWS.am STYLE  - ի թղթակցին տվել է «Տատու արտ» սրահի մասնագետ Գագիկ Մկրտչյանը։

Այսօր շատ են այն տատու-սրահները, որտեղ աշխատողը մասնագետ չէ։ Ինչպե՞ս տարբերել մասագետին ոչ մասնագետից եւ ինչի՞ն առանձնահատուկ ուշադրություն դարձնել։

Տատուի վարպետի մասնագիտական ունակությունների մասին պատկերացում կազմելու համար հարկավոր է նախ ծանոթանալ նրա կատարած աշխատանքին. նախապես նայել նկարներն ու համոզվել, որ դա իր ձեռքի գործն է, այլ ոչ՝ ինտերնետից ներբեռնված։ Դա կօգնի հասկանալ՝ որքանով տվյալ մասնագետը կկարողանա գլուխ բերել աշխատանքը։ Ուշադրություն են պահանջում նաեւ եւ հատկապես ասեղները։ Դրանք պետք է լինեն մեկանգամյա օգտագործման, այլապես, կարող են լուրջ հիվանդությունների պատճառ դառնալ։ Ստերիլ պայմանները տատուի պարագայում շատ կարեւոր են։

Շաքարախտով հիվանդներին եւ արյան մակարդելիության խնդիր ունեցողներին խորհուրդ չի տրվում դաջվածք անել։ Կա՞ն մարդիկ, ովքեր, այնուամենայնիվ, դիմում են ռիսկի։ Դուք աշխատո՞ւմ եք նրանց հետ։

Ես սկզբունքորեն աշխատում եմ չափահասների հետ։ Աշխատել եմ եւ շաքարախտով, եւ հեպատիտով հիվանդների հետ։ Նրանց առողջության հետ կապված բարդություններ չեն եղել։ Եթե գործիքներն օգտագործվում են մեկ անգամ, իսկ նյութերն անցել են համապատասխան բժշկական հետազոտություն, ապա առողջությանը վտանգ չի կարող սպառնալ, անգամ թվարկված հիվանդությունների դեպքում։ Ռիսկային է հատկապես առաջին շաբաթը։ Տատուն այդ ժամանակ հատուկ խնամք է պահանջում, քանի որ համարվում է բաց վերք։ Այն պետք է «խնամել» հատուկ քսուքներով։

Կա, արդյո՞ք, սեզոնաին տատու հասկացություն։

Ոչ։ Սակայն կա սեզոնային խնամք։ Տատու նախընտրելի է անել ձմռանը, քանի որ ամռանը մարդկանց քրտնարտադրությունն առատ է, եւ դա երկարացնում է տատուի ‹‹ապաքինումը››։ Կան մարդիկ, ովքեր տատու են անում ու անմիջապես հաջորդ օրը մեկնում են ծով։ Այդպես չի կարելի, քանի որ արևի ճառագայթներն ու ավազը վնասակար են «թարմ» տատուի համար։ Նման դեպքերում դաջվածքի, ինչպես նաեւ առողջության հետ մի շարք խնդիրներ կարող են առաջանալ։

Կա, արդյո՞ք, մարդու մարմնի մի մաս, որի վրա բժշկական տեսանկյունից կհակացուցված է դաջվածք անել։

Նման հակացուցումներ չկան։ Դաջվածքի պարագայում ‹‹հակացուցված է›› միայն վատ մասնագետը։ Քանի որ, յուրաքանչյուր մարդու մաշկ առանձնահատուկ է, ապա տատու անելիս անհատական մոտեցում պետք է լինի. ասեղը մաշկի մեջ մտնի համապատասխան չափով, որպեսզի արյան հոսք չլինի։ Մարդու առողջությանը չվնասելու համար կարևոր այլ գիտելիքներ են հարկավոր։ Որակյալ նյութերով աշխատելու դեպքում ոչ մի վնասակար հետևանք չի լինի։ Միայն այդ դեպքում կարելի է հասնել ցանկալի արդյունքի՝ միաժամանակ պահպանելով առողջությունը։

NEWS.am STYLE