Արևիկն ու Ռոբերտը 10 տարվա ամուսիններ են։ Արևիկի առողջական խնդիրների պատճառով նրանք երեխա ունենալ չեն կարող։ Երկար մտածելուց հետո ի վերջո որոշել են դիմել փոխնակ մոր օգնությանը։ Անգամ հայտարարություն են գրել ու փակցրել քաղաքի տարբեր հատվածներում։ Գտել են մի կնոջ, ով գումարի համար պատրաստ է դիմել նման քայլի, որպեսզի կարողանա պահել իր երկու երեխաներին, որոնց հայրը մահացել է։ Գումարի չափը նրանք չցանկացան հրապարակել, միայն ասացին, որ բավականին կլորիկ գումար է՝ մոտ 10 հազար ԱՄՆ դոլարից ավելին։ Բացի գումարից երեխա ցանկացող ընտանիքը պարտավորվել է այդ ընթացքում հոգալ հղի կնոջ բոլոր ծախսերը։

«Փոխնակ մորը ընտրելու հարցում բազմաթիվ նրբություններ ենք հաշվի առել, կնոջ կրթությունից մինչև հոգեբանություն»,–ասաց Արևիկը։

Փոխնակ մայրության մասին օրենքը Հայաստանում ուժ է ստացել 2002 թվականին, կիրառելի դարձել` 2006-ից, բայց ավելի լայն տարածում է ստացել վերջին տարիներին: Ոչ բոլոր հիվանդանոցներում, բայց կան մի քանի հիվանդանոցներ, ովքեր զբաղվում են այդ խնդրով։ Հոգեբան Աննա Խաչատրյանը, սակայն, վստահ է՝ փոխնակ մորը դիմելը, այնքան էլ արդյունավետ չէ։ «Փոխնակ մայրը կարող է ունենալ ոչ նորմալ մտածելակերպ, լինի ոչ այնքան բարոյական, իսկ նրա մտքերն ու հոգեբանությունը փոխանցվում է երեխային, մյուս կողմից փոխնակ մայրը պետք է ունենա այնպիսի մտածելակերպ, որ գիտակցի, որ երեխան, որին կրում է կրծքի տակ, իրենը չէ, և դժվարությամբ չբաժանվի և այդուհետ, որևէ խնդիր չլինի»,–ասաց նա։

Ի դեպ, նշենք, որ առողջապահության նախարարությունը, այս հարցի վերաբերյալ վիճակագրական տվյալներ չունի, քանի որ նման արդյունքներ չկան։ Այսօր Հայաստանում կան միայն մի քանի բժշկական կենտրոններ, որոնք պաշտոնապես զբաղվում են նման տեսակի բեղմնավորմամբ։ Սակայն, այդ հաստատությունները խուսափեցին որևէ ինֆորմացիա տրամադրել, որպես լրագրող, իսկ որպես հաճախորդ տեղեկացրին, որ գները տարբեր են՝ երբեմն լինում են նաև անվճար հիմունքներով։

Գինեկոլոգ Անահիտ Սիմոնյանը մեզ հետ զրույցում նշեց, որ փոխնակ մայր լինելու համար միայն մեծ ցանկությունը բավարար չէ.« կինը պետք է անցնի համապատասխան բուժզննում»։