Ինչպես մյուս երկրներում, Հայաստանում ևս գործում է սերմնահեղուկի բանկ: Հայաստանում, սակայն, հավզադեպ են լինում դեպքեր, երբ տղամարդն իր ցանկությամբ` բարեգործական հիմունքներով է հանձնում իր սերմնահեղուկը: Այս մասին այսօր լրագրողների հետ հանդիպման ժամանակ ասաց Մոր և մանկան առողջության պահպանման գիտահետազոտական կենտրոնի տնօրեն Գեորգի Օկոևը: Թե որքան գումար է անձը ստանում իր սերմնահեղուկի դիմաց, Օկոևը չցանկացավ բարձրաձայնել: Նա միայն նշեց, որ սերմնահեղուկի ստացման, դրա սառեցման, բեղմնավորման նախապատրաստման համար ծախսվում է մոտ 70-75 հազար դրամ:

Հարցին, թե արդյո՞ք դոնորի համար հստակ չափորոշիչներ կան, բժիշկը պատասխանեց, որ տղամարդը պետք է լինի երիտասարդ, առողջ, և ցանկալի է, որ ունենա իր երեխան:

Ըստ Օկոևի, վերջին շրջանում շատացել է արհեստական ճանապարհով բեղմնավորման համար դիմող հիվանդների քանակը:

Մասնագետը նշեց, որ երեխա ունենալ ցանկացող մինչև 35 տարեկան զույգին տրվում է մեկ տարի ժամանակ, իսկ 35-ից բարձր զույգին` 6 ամիս, եթե բեղմնավորում չի ստացվում այդ ժամկետում, ապա նրանք պետք է դիմեն մասնագետի: Իսկ եթե 2 տարի բուժումից հետո կինն այնուամենայնիվ չի հղիանում, ապա պետք է դիմել արհեստական բեղմնավորման մեթոդին: