Վանաձոր-Երեւան եւ Երեւան-Վանաձոր ուղեւորափոխադրումների սակագները երեկ անակնկալ թանկացել են: Միկրոավտոբուսները ուղեւորափոխադրումներն իրականացնում են նախկին 1200 դրամի փոխարեն 1400 դրամով, ավտոբուսը` նախկին 1000 դրամի փոխարեն` 1200 դրամով, իսկ "Հունդաի” մակնիշի ութտեղանոց փոքր միկրոավտոբուսները` նախկին 1500 դրամի փոխարեն` 1800 դրամով:

Դեռեւս հայտնի չէ, թե որքան կթանկանա տաքսի ծառայության սակագինը: Դեպի մայրաքաղաք եւ այնտեղից Վանաձոր ուղեւորափոխադրումները հիմնականում իրականացնում է "Վանաձոր տաքսի”-ն`յուրաքանչյուր ուղեւորի համար 2000-ական դրամով:

Ուղեւորափոխադրումների սակագների թանկացումը պայմանավորում են դիզվառելիքի գների թանկացմամբ: Նշենք, սակայն, որ վերջին օրերին բենզինի գինն էժանացավ 10 դրամով, թեեւ այն տարեսկզբից թանկացել է շուրջ 8 տոկոսով, իսկ բենզինի վերջին թանկացումը նկատվել է ապրիլ ամսին:

Հավելենք, որ Վանաձորից Երեւան եւ հակառակ ուղղությամբ ուղեւորափոխադրումների առյուծի բաժինը միկրոավտոբուսներինն է: Ի դեպ, եթե նախկինում ուղեւորափոխադրումներն իրականացվում էին "Ֆորդ” մակնիշի միկրոավտոբուսներով, այժմ միջմարզային երթուղին սպասարկող մեքենաների թվում, գազելներ են հայտնվել, իսկ երեկոյան ժամերին ուղեւորափոխադրումներ են իրականացնում այսպես ասած, "գծից հանած” գազելները, որոնք պարտավոր են իրականացնել ներքաղաքային ուղեւորափոխադրումներ:

Henaran.am-ին հասած տեղեկություններով, առաջիկայում  երթուղին սպասարկվելու է բացառապես գազելներով, գծատերը վաճառքի է հանում "Ֆորդ” մակնիշի մեքենաները: Ստացվում է, որ մի կողմից ուղեվարձն է թանկանում, մյուս կողմից էլ վատանում է սպասարկման որակը, մինչդեռ հակառակը պետք է լիներ:

henaran.am