Ռուսաստանի Դաշնության Կամենսկ- Ուրալսկ քաղաքի ոստիկանությունը հունիսի 6-ին զանգվածային ձերբակալություններով կանխել է ռուսների ու ուզբեկների ծրագրած հայերի «կոտորածը», գրում է «Վեչերնիե վեդոմոստի» թերթը: Հատուկ գործողություն անցկացնելու որոշումը կայացվել է նման տեղեկություն ստանալուց անիջապես հետո:

Թերթի համաձայն` վիճաբանությունը սկսվել է դեռ մայիսյան տոներից առաջ: Ապրիլի 29-ի երեկոյան Բաժովի փողոցի վրա գտնվող «Մեգա Պիցցա» սրճարանում վիճաբանություն է սկսվել Կամենսկ-Ուրալսկի հայկական ու ուզբեկական համայնքների ներկայացուցիչների միջև: Կռվի պատճառը եղել է ալկոհոլը:

Հաջորդ օրը Մարքսի փողոցի վրա անհայտ անձինք հարձակում են գործել երկու ուզբեկների վրա: Տուժածները տարբեր աստիճանի մարմնական վնասվածքներով տեղափոխվել են հիվանդանոց:

Հունիսի 4-ին հրազենային վնասվածքով նույն հիվանդանոց է տեղափոխվել Հայաստանի մի քաղաքացի: Նա ոստիկանությանը հայտնել է, որ երեկոյան իր մեքենայի ուղղությամբ անհայտ անձինք կրակահերթ են բացել:

Այս դեպքից հետո, ոստիկանությանը հաջողվել է պարզել, որ հունիսի 6-ին մի խումբ երիտասարդներ, որոնց թվում` Ռուսաստանի ու Ուզբեկստանի քաղաքացիներ, ծրագրել են ներխուժել հայկական համայնքի բնակության վայրեր ու «կոտորած իրականացնել»:

Հատուկ գործողության արդյունքում ոստիկանները նրանց մոտից առգրավել են բենզին, մահակներ, կապի միջոցներ, տրավմատիկ, գազային ու հրազենային զենքեր: Առգրավված ատրճանակներից մեկը պատկանել է անվտանգության մասնավոր մի ընկերության: Ընկերությունում ստուգումների արդյունքում այն զրկվել է զենք կրելու իրավունքից:

Հատուկ գործողությանը մասնակցել է մոտ 50 ոստիկան, իսկ «ռազբորկային» նախատեսվում էր մոտ 70 մարդու մասնակցություն: Քննության վարկածով` ռուս-ուզբեկական «բանդային» պետք է միանային ևս 50-60 «մարտիկներ»` 12 մեքենայով: «Կոտորածի» կազմակերպիչներն ու 18 ակտիվիստներ ձերբակալվել են:

«Սարսափելի է պատկերացնել, թե ինչ կլիներ, եթե ոստիկանությունը ժամանակին չմիջամտեր»,- հռետորական հարց է ուղղում թերթը: