Երեկ Շիրակի մարզի Վահրամաբերդ համայնքում տեղի ունեցածով դեռևս որևէ քաղաքական գործիչ, պաշտոնյա չի հետաքրքրվել: Արձագանք չկա ինչպես հայկական, այնպես էլ ռուսական կողմից: Ընտանիքներին աջակցություն տրամադրել է միայն համայնքապետարանը՝ 100 հազար դրամի չափով` այս մասին մեր լրագրողի հետ զրույցում նշել է Վահրամաբերդի գյուղապետ Աղվան Մարտիրոսյանը: Հիշեցնենք, երեկ Վահրամաբերդի արոտավայրերում՝ ռուսական զորքերի տանկային հրաձգարանի տարածքում տեղի ունեցած պայթյունից մահացել են Վահրամաբերդի երկու անչափահաս երեխաներ՝ 10-ամյա Արթուր Մկրտչյանը և 15-ամյա Մուշեղ Գևորգյանը:

Գյուղապետը մեր լրագրողի հետ զրույցում նշել է, թե երկու ընտանիքներն էլ սոցիալապես դժվարին պայմաններում են ապրում, և հուղարկավորության ծախսերը հոգալու համար միջոցներ չկան. «Տարբեր մարդկանց ենք դիմել` ծանոթ-անծանոթներին, բարերար-հովանավորներին, խնդրել ենք օգնեն, որ կարողանանք հոգալ հուղարկավորման ծախսերը, երկու ընտանիքների վիճակն էլ ահավոր է, անչափահաս երեխաներ, իրանք աշխատանք չունեն, հովիվ մարդ է`ինչո՞վ անի էդ ամենը»,- նշել է գյուղապետ Աղվան Մարտիրոսյանը: Մեր լրագրողը գյուղապետից հետաքրքրվել է նաև, թե արդյո՞ք չեն վերլուծել երեկ տեղի ունեցածը և ի՞նչ եզրակացության են հանգել` ով է պատասխան տալու երկու երեխաների մահվան համար.

«Դե չգիտեմ, Հայաստանի և Ռուսաստանի կառավարությունները պայմանագիր են կնքել, մեր գյուղի արոտավայրերը անհատույց ՝ առանց որևէ վճարի տվել են ռուսական կողմին, մենք ինչ անենք, էդ դաշտերը մեր գյուղի արոտավայրերն են եղել, մարդիկ նորից էդտեղ կտանին անասուններին, ուղղակի էրեխեքն էս անգամ շատ են առաջ գնացել, չէինք մտածում, որ նման բան կլինի»,- ասել է գյուղապետ Աղվան Մարտիրոսյանը: