Սիրահարված մարդիկ իրենց սիրեցյալի ֆիզիկական հատկանիշներն անհամեմատ ավելի գեղեցիկ են տեսնում, քան մյուսները: Ի դեպ, այդպես է գրեթե միշտ. այս հարցում իր օբյեկտիվությամբ պարծենալ չի կարող ոչ մի իսկական սիրահարված: Նման հայտարարությամբ հանդես են եկել Օսլոյի համալսարանի գիտնականները հերթական փորձն ավարտելուց հետո: Պարզվել է՝ սիրահարվածի աչքից վրիպում են անգամ ոչ փոքր մասշտաբի ֆիզիկական թերություններ, որոնք հեշտությամբ նկատել են ուրիշ հարցվածներ:

Գիտնականները սա բացատրել են այն պոզիտիվ պատրանքներով, որ ստեղծվում են սիրահարվածի ուղեղում, եւ որոնց նպաստում են նաեւ հորմոնալ փոփոխություններ: Սակայն մասնագետները խորհուրդ չեն տալիս շատ ոգեւորվել, քանի որ հարաբերությունների վատացման ժամանակ տեղի է ունենում ճիշտ հակառակը. մթնում է իրականությունը, եւ թերություններն ավելի սրված են երեւում սիրահարվածին, քան ուրիշ մեկի:

Այնպես որ, սիրելի լեդիներ, երկու անգամ էլ սխալվում ենք սիրելիի հանդեպ, առաջին դեպքում՝ հօգուտ, երկրորդ դեպքում՝ ի վնաս նրա…