Երեկ Արարատի և Վայոց Ձորի ընդհանուր իրավասության դատարանում մոտ 4 ժամ տևեց դատական նիստը, որտեղ լսվում էր Մարիամ Գևորգյանի հայցն ընդդեմ սկեսուր Հայկանուշ Միքայելյանի, ով մեղադրվում է հարսին պարբերաբար խոշտանգումների համար: Դատավարությունը շարունակվելու է օգոստոսի 9-ին: Քանի որ նիստը դռնփակ է, ուստի մանրամասների մասին փաստաբաններն իրավունք չունեն տեղեկատվություն հրապարակել:

Երեկ դատարանի շենքի առջև թե մեղադրող, և թե մեղադրվող կողմերի հարազատները բողոքի ակցիա էին կազմակերպել:

Նշենք, որ տուժող կողմը որպես փոխհատուցում նաև պահանջում է 17 միլիոն 350 հազար դրամ. սա առիթ դարձավ, որ տուժող Մարիամ Գևորգյանի նախկին ամուսինն ու ծեծի ենթարկած սկեսուրի հարազատները հայտարարեն, որ այս դատական հայցը մի նպատակ ունի` ուզում են իրենցից փող պոկել:

''Առավոտ''-ը Մարիամ Գևորգյանի փաստաբան Նոնա Գալստյանից հետաքրքրվել է, թե ինչի՞ հիման վրա է հաշվարկվել 17 միլիոն 350 հազար դրամը: Փաստաբանի խոսքով` ցանկացած տուժող, որին հանցագործությամբ պատճառվել է վնաս, իրավունք ունի վնասի փոխհատուցում պահանջել, տվյալ դեպքում այդ գումարը բարոյական և նյութական վնասի հանրագումարն է: Ինչ վերաբերում է գումարին, ապա դա բժշկական փաստաթղթերի հիման վրա հաշվարկված գումարն է, որով հետագայում, եթե դատավճիռը կայացվի հօգուտ տուժողի, պետք է ուղղվի բժշկական ծառայություններին: Այսինքն` փոխհատուցման գումարով պետք է վերականգնվի Մարիամ Գևորգյանի առողջությունը, որը, ըստ հայցի, վնասվել է խոշտանգումների արդյունքում:

Հիշեցնենք, որ տուժող Մարիամ Գեւորգյանը նախկին ամուսնուն եւ նախկին սկեսուրին մեղադրում է, որ ամուսնության ընթացքում իրեն պարբերաբար դաժան ծեծի են ենթարկել` արդուկով այրել մարմնի որոշ հատվածներ եւ պատառաքաղով ծակծկել ամբողջ մարմինը: Նշենք, որ տուժողի նախկին ամուսինը նախորդ տարի համաներմամբ ազատ է արձակվել եւ այժմ միայն Մարիամի նախկին սկեսուր Հայկանուշ Միքայելյանը, որը կալանավորված է, դատարանում ''պատասխան է տալիս'':

mamul.am