Ստամբուլի դատախազությունը մինչեւ 12 տարվա ազատազրկում է պահանջել հայազգի Նարինե Մկրտչյանին ինքնասպանության դրդած Օրհան եւ Բարըշ Օքմուշ եղբայրների համար:

Թուրքական Vatan թերթի փոխանցմամբ, Ստամբուլի դատախազ Իբրահիմ Քայափընարը Օրհան Օքմուշի համար պահանջել է 4-12 տարի ազատազրկում` Նարինեին ինքնասպանության դրդելու մեղադրանքով, Բարըշ Օքմուշին` 2-6 տարվա ազատազրկում` Նարինեին շանտաժի ենթարկելու համար:

Ինչպես ավելի վաղ հայտնել էր NEWS.am-ը, 21-ամյա Նարինե Մկրտչյանը 2010թ. խորթ հոր եւ եղբոր հետ աշխատելու համար տեղափոխվել էր Ստամբուլ: Նարինեն աշխատանքի է  տեղավորվել մի վարպետի մոտ եւ արդեն կարճ ժամանակում հասցրել է վարպետանալ արծաթագործության մեջ: Նա սիրահարվել էր Օրհան Օքմուշին եւ մտադիր է եղել ամուսնանալ նրա հետ, սակայն Օրհանը խաբելով Նարինեին՝ քնել էր նրա հետ եւ գաղտնի նկարահանել մերկացած Նարինեին։  Այնուհետ Օրհանի եղբայրը՝ Բարըշը Նարինեին ստիպել էր իր հետ էլ պառկել՝ սպառնալով նրա մերկ կադրերը ցույց տալ եղբորը։

Բարըշը մերժում ստանալուց հետո Նարինեի եղբորը ցույց էր տվել տեսագրությունը։ Ժորան զայրացած վիճել էր Նարինեի հետ եւ ապտակել նրան։ Դրանից հետո Օրհանը եւ Բարըշը Նարինեից գումար էին պահանջել՝ այս անգամ սպառնալով նրա մերկ կադրերը տեղադրել ինտերնետում։ Նարինեն փորձել էր աշխատանքի վայրից հայթայթել պահանջված գումարը, սակայն անհաջողության էր մատնվել եւ 2012 թվականի մարտին ինքնասպանություն էր գործել՝ ցիանիդ խմելով: Աղջկա ինքնասպանության մասին լսելուց հետո շտապ Թուրքիա էր ժամանել մայրը՝ Նունե Մկրտչյանը եւ դիմել իրավապահ մարմիններին։ Նարինեին սեռական շանտաժի ենթարկելու միջոցով ինքնասպանության դրդած թուրք եղբայրները ձերբակալվել էին: