Վարդենիսի Մեծ Մասրիկ համայնքում բնակվող Մկրտչյանների բազմազավակ ընտանիքում 6-րդ երեխան է ծնվել: 5 դուստրերից հետո նրանք վերջապես որդի են ունեցել:

ՄԱՄՈՒԼ.am լրատվականի թղթակցի հետ զրույցում 45-ամյա հայրն ասաց, որ հպարտանում է 37-ամյա կնոջ քաջությամբ ու նվիրվածությամբ. նույնիսկ սոցիալական պայմանները չխանգարեցին գնալ այդ քայլին: ''Մեծ դուստրս 19 տարեկան է, ամուսնացած է, բնակվում է Ռուսաստանում, մեկ որդի ունի: Թոռնիկս որդուցս մի քանի ամսով է մեծ'',- ասաց Մանվել Մկրտչյանը: Նրա խոսքով` ընտանիքի սոցիալական պայմաններն այնքան էլ բավարար չեն, քանզի միայն հող մշակելով, մի քանի պարկ կարտոֆիլ ու սխտոր վաճառելով հազիվ կարողանում են կոմունալ ծախսերը հոգալ. ''Պետության կողմից 44 հազար դրամ նպաստ ենք ստանում, դա էլ մի քանի օրում վերջանում է. մեծ ընտանիք ենք, ծախսը շատ է, էլ չեմ ասում դպրոցի պարագաների մասին, սեպտեմբերն էլ բացվում է'',- ասաց նա` հույս ունենալով, որ վեցերորդ երեխայի ծննդյան հետ կապված` օգնությունը կշատանա:

Հիշեցնենք` օրերս նմանատիպ իրադարձություն էր տեղի ունեցել նաև Եղեգնաձորում. Հովհաննիսյանների ընտանիքում 8-րդ երեխան էր ծնվել:

mamul.am