Տավուշի մարզի ընդհանուր իրավասության առաջին ատյանի դատարանում սկսվել է երևանցիներ հայր և որդի Տաքտաքյանների դատավարությունը: Այս մասին գրում է թերթը` նշելով, որ ըստ մեղադրանքի` Վ.Տաքտաքյանն իր որդու` Գ.Տաքտաքյանի հետ Երևանում զբաղվելով արծաթյա իրերի վաճառքով, Թբիլիսի քաղաքում իրացման նպատակով ձեռք է բերել 3868.10 գրամ քաշով` 3մլն. 75 հազար 700 դրամ շուկայական արժեքով արծաթյա իրեր: 2013թ. մարտի 18-ին նրանք Վրաստանից մուտք են գործել Բագրատաշենի մաքսակետի տարածք` արծաթյա իրերն ավտոմեքենայի խցիկում` վարորդի կողքի նստատեղի աջ կողմնում փոքր խցիկում և հետևի նստատեղի վրա տեղափոխելով ՀՀ մաքսային սահմանով: Մաքսանենգության փաստը հայտնաբերվել է ԱԱԾ Տավուշի մարզային վարչության աշխատակիցների կողմից` մեքենայի կրկնակի զննությամբ: Տաքտաքյաններին մեղադրանք է առաջադրվել ՀՀ քրեական օրենսգրքի 215-րդ հոդվածի 1-ին մասով, որով նախատեսվում է տուգանք` նվազագույն աշխատավարձի հազարապատիկից երեքհազարապատիկի չափով կամ ազատազրկում` առավելագույնը 5 տարի ժամկետով: Հոդվածն ամբողջությամբ կարդացեք «Ժողովուրդ» օրաթերթի այսօրվա համարում: