LN-ի հյուրասրահում է դերասանուհի Նաիրա Մովսիսյանը:

-Նաիրա, գիտենք, որ «Դոն Ժուան ավիա» ներկայացման մեջ Ձեր կերտած կերպարի համար «Լավագույն դերասանուհի»  նոմինացիային եք ներկայացված ու մեկնելու եք ԱՄՆ՝ մասնակցելու մրցանակաբաշխությանը: Ե՞րբ եք մեկնում, նորությունն ինչքանո՞վ էր Ձեզ համար սպասելի,  ի՞նչ ակնկալիքներ ունեք:

-Գնալու եմ ԱՄՆ այդ մրցանակաբաշխությանը մասնակցելու, բայց թե ինչ կլինի, նախընտրում եմ խոսել վերադարձից հետո:

-Կարծում եմ`չկա այդպիսի մարդ, որ ինչ-որ ներքին վախեր չունենա, ինչի՞ց Է ամենաշատը վախենում Նաիրա Մովսիսյանը:

-Ահավոր շատ վախենում եմ կորստից, մեկ էլ ստից. այն ինձ համար շատ դժվար է:

-Նկատի ունեք մարդուն ֆիզիկապես կորցնե՞լը:

-Ե՛վ  ֆիզիկապես, ե՛ւ հոգեպես, չնայած հոգին ավելի եմ կարեւորում:

-Խնդիրները, որոնց բախվում եք առօրյայում, ինչպե՞ս եք լուծում:

-Անկեղծ եմ ասում` երբեւէ որեւէ խնդիր չեմ ունեցել իմ կյանքում:

-Այսինքն՝ Ձեր կյանքում ամեն ինչ հա՞րթ է ընթանում:

-Գուցե պրիմիտիվ է, բայց` այո՛:

- Ինչպես Դուք եք ասել, «խելառ ու գիժ» բաներ սիրում եք, օրինակ՝ հանուն սիրելի  մարդու ի՞նչ գժության եք պատրաստ:

-Ասել եմ բազմիցս` չգիտեմ, թե ինչ կանեմ, որովհետեւ չգիտեմ`ինչ կլինի, որ չեմ անի:

-Այսինքն՝ Ձեզնից ցանկացած խենթություն կարելի՞ է սպասել:

-Այո՛, իմ գիտակցված սահմանների չափով:

- Ոճային փոփոխություններ Ձեզ մոտ հաճախ է նկատվում, ամեն հարցո՞ւմ եք այդպես փոփոխական: Նկատի ունեմ` բնավորությո՞ւն է:

-Կարելի է ասել ե՛ւ այո, ե՛ւ ոչ. կան արժեքներ, որոնք անբեկանելի են ու անփոխարինելի, մնացյալ հարցերում փոփոխական եմ:

-Կթվե՞ք` որոնք են Ձեզ համար անբեկանելի արժեքներ, մի քանիսը…..

-Կրոնը, հավատը, չստելը: Արժեք է ինձ համար մարդ մնալը:

- Օրվա ընթացքում ինչքա՞ն ժամանակ եք անցկացնում հայելու առջեւ, եթե հաշվի առնենք, որ միշտ խնամված եք:

-Շատ քիչ. ինչքան հնարավոր է, խուսափում եմ արտացոլանքիցս` հայելու միջոցով. հոգին ավելի եմ կարեւորում:

- Կանացի ի՞նչ թուլություններ ունեք:

-Երբեւէ չեմ կենտրոնացել, ու այս տարիների ընթացքում առաջին հարցն է, որ ինձ չէին տվել:

-Իսկ եթե փորձեք այնուամենայնիվ հասկանա՞լ:

-Գեղեցիկ նորությունները, փորձեն ինձ ինչ-որ տարօրինակ բաներով զարմացնել: Ինչու չէ, տղամարդն էլ է թուլություն:

-Տղամարդուն համարում եք Ձեր կանացի թուլությունների՞ց:

-Այո՛, համարում եմ:

- Ի՞նչ եք կարծում տղամարդու ամենամեծ ակնկալիքը կնոջից ո՞րն է:

-Նայած տղամարդ, նայած կնոջից:

-Իսկ եթե մի քիչ գլոբա՞լ:

-Սեր, ձգտման հասնելու կետ, անկողին, հարգանք, ընկերություն, մտերիմ անձ, լիարժեք զգալու տենչ:

- Էությամբ ինչպիսի՞ն եք, օրինակ՝ երազկո՞տ եք:

-Ո՛չ, բանական եւ ռեալ, երբեմն զգացմունքային:

- Երբևէ զղջացե՞լ եք մասնագիության ընտրության հարցում:

-Երբեք, սիրում ու ապրում եմ միայն իմ մասնագիտությամբ:

- Սերիալներում գրեթե միշտ հանդես եք գալիս բացասական դերերում, կասե՞ք`ինչով է պայմանավորված: Ձեր կերպարների հետ գոնե չնչին նմանություն ուենո՞ւմ եք:

-Կապված է ռեժիսյորի, սցենարիստի ու իմ ցանկության հետ, իսկ խաղացած կերպարներին ընդհանրապես նման չեմ:

-Այսինքն՝ բացասական դերեր Դուք եք ավելի՞ եք նախընտրո՞ւմ:

-Ո՛չ, ինձ հետ վերջում համաձայնեցնում են:

-Կա՞ն դերեր, որոնք բացառում եք`մի օր կխաղաք:

-Կարծում եմ` ոչ. ամեն կերպարի մեջ մի հետաքրքրություն կա: Չնայած եթե լինի այնպիսի կերպար, որ քարոզչությամբ կզբաղվի, աթեիզմ կամ ինչ-որ աղանդ կքարոզի, կհրաժարվեմ միանշանակ, իսկ եթե իմանամ`մարդկանց դա չի շեղի,  կհամաձայնեմ:

- Ներկայացում, որ նախկինում խաղացել եք, ու կուզեիք նորից խաղալ:

-Դիպլոմային ներկացումս` Նադեժդա Պտուշկինայի «Աննորմալը» պիեսի հիման վրա բեմադրված: Կարոտել եմ շատ այդ կերպարին, նույնիսկ երազում եմ խաղում:

-Իսկ նպատակներ չկա՞ն ներկայացումը նորից բեմ հանելու:

-Դեռ ոչ, երկու տարի առաջ փորձեցի, բայց չստացվեց:

- Հայ կամ համաշխարհային բեմի դերասանուհիներից կա՞ ինչ-որ մեկը, ում ձգտում եք նմանվել, կամ ով Ձեզ համար օրինակ է:

-Ո՛չ, յուրաքանչյուր լավ մասնագետի գնահատում եմ յուրովի, բայց չեմ դարձնում ինձ համար օրինակ կամ դառնում նմանակ:

-Ի՞նչ է սերը կնոջ համար:

-Կյանք եւ միաժամանակ մահ, ամեն ինչ եւ ոչինչ:

-Ծայրահեղ եք, այո՞:

-Այո՛:

-Ամեն հարցո՞ւմ եք այդպիսին:

-Ցավոք սրտի, այո՛:

- Մեր շոու բիզնեսի գեղեցիկ սեռի ներկայացուցիչներից մի քանիսը դիմել են համարձակ քայլի` լուսանկարվելով մերկ կամ կիսամերկ, հնարավո՞ր է` Դուք էլ մի օր դիմեք մեր հասարակությունում համարձակություն պահանջող այդ քայլին:

-Դրա համար համարձակություն չեմ կարծում` պետք է, կնկարվեմ թեկուզ իմ ֆոտոդարանի համար: Կիսամերկ նկարներ հիմա էլ ունեմ:

-Ի դեպ, կասեք`ո՞րն է Ձեր մասին լսած ամենազավեշտալի բամբասանքը:

-Ունեմ սիրեկան, երեխա, որին թողել եմ ու ամենահայտնի սիրուհիներից եմ  (ծիծաղում է-LN):

- Ըստ Ձեզ` երջանկության բանաձևը ո՞րն է:

-Ուղղակի երջանիկ լինել, ապրել, եթե ապրում ես, ուրեմն երջանիկ ես:

- Ի վերջո, ի՞նչ եք կարծում, ի՞նչն է կնոջը դարձնում ցանկալի, հմայիչ ու կանացի:

-Կանացի լինելը եւ մնալը:

-Կանացի լինելու եւ մնալու գաղտնիքը ո՞րն է, եթե իհարկե ինչ-որ գաղտնիք կա:

-Ոչ մի գաղտնիք էլ չկա, պետք է հաճախակի ինքդ քեզ ժպտաս ու ինքդ քեզ լուսավոր ընկալես:

Շողիկ Գալստյան

ladynews.am