Լոռիի մարզում 24-ամյա հարսը` Մ.Է.-ն, ծեծի է ենթարկել սկեսուրին, ինչից հետո սկեսրայրը` 62-ամյա Ս.Է.-ն, դանակահարել է հարսին: Լոռիի մարզի ընդհանուր իրավասության դատարանից NEWS.am-ը տեղեկացավ, որ սույն գործը քննվում է  իրենց մոտ եւ այսօր` հոկտեմբերի 11-ին շարունակվել է սույն գործի դատական քննությունը:  24-ամյա Մ. Է-ին մեղադրանք է առաջադրվել այն բանի համար, որ նա 28.07.2012թ. ժամը 16-ի սահմաններում Վանաձոր քաղաքի Տ. Մեծի պողոտայում գտնվող իրենց  բնակարանում, կենցաղային հարցի շուրջ ծագած վիճաբանության ընթացքում, մարմնական վնասվածքներ պատճառելու դիտավորությամբ, ձեռքերով հարվածել է սկեսուրի՝ Ս. Փ-ի աջ բազկի շրջանին, վերջինիս առողջությանը պատճառելով թեթեւ վնաս՝ առողջության կարճատեւ քայքայումով:

Քրեական գործ է հարուցվել 117 հոդվածի հատկանիշներով` դիտավորությամբ մեկ ուրիշին մարմնական վնասվածք կամ առողջությանն այլ վնաս պատճառելը, որն առաջացրել է առողջության կարճատեւ քայքայում կամ ընդհանուր աշխատունակության աննշան կայուն կորուստ: Սույն հոդվածը պատժվում է տուգանքով` նվազագույն աշխատավարձի 50-150-պատիկի չափով: Իսկ սկեսրայրին 62-ամյա Ս. Է-ին մեղադրանք է առաջադրվել այն բանի համար, որ նա նույն հասցեում, նույն օրը կենցաղային հարցի շուրջ ծագած վիճաբանության ընթացքում, խոհանոցային դանակով սպանության սպառնալիքներ է տվել հարսին՝ Մ.Է-ին, ինչն իրականացնելու իրական վտանգ է եղել, ապա նույն դանակով հարվածել է նրա աջ դաստակի չորրորդ մատին եւ վերջինիս առողջությանը պատճառել թեթեւ վնասի հատկանիշներ չպարունակող մարմնական վնասվածք:

Նրա դեմ էլ քրեական գործ է հարուցվել 118-րդ հոդվածի հատկանիշներով` ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետեւանքներ` պատժվում է տուգանքով` նվազագույն աշխատավարձի առավելագույնը 100-պատիկի չափով, կամ կալանքով` առավելագույնը 2 ամիս ժամկետով: Սկեսրայրի դեմ քրեական գործ է հարուցվել նաեւ 137 հոդվածի 1-ին մասերով` սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել: Սույն հոդվածն էլ պատժվում է տուգանքով՝ նվազագույն աշխատավարձի 50-100-պատիկի չափով, կամ կալանքով` առավելագույնը 2 ամիս ժամկետով, կամ ազատազրկմամբ` առավելագույնը 2 տարի ժամկետով: