Չնայած Ամանորին դեռ 11 օր է մնացել, սակայն արդեն իսկ մարդկանց մոտ տոնական իրարանցում է և իհարկե տոնական տրամադրություն: Հայաստանյան խանութներում հատկապես երեկոյան ժամերին մարդկանց հոսքն անպակաս է: Սա թերևս կարելի է բնութագրել որպես հայկական տիպիկ բնավորություն:Կամ ինչպես հայտնի ֆիլմում է ասվում` «Aрмянское гостеприимство»:
Չնայած սա էլ իր արդարացումն ունի. ի տարբերություն այլ երկրների, Հայաստանում Ամանորի նախաշեմին պարենի գները կտրուկ բարձրանում են, ուստի, բնականաբար, մարդիկ նախընտրում են իրենց պատրաստությունը տեսնել ոչ թե վերջին օրերին, այլ տոներից 10 կամ անգամ 20 օր առաջ:
Հայերին բնորոշ է նաև Ամանորին ճոխ սեղան ունենալը. որքան սեղանը ճոխ է,` այնքան տանտիրոջ թասիբն է բարձր: Եթե այլ երկրներում, օրինակ, Ռուսաստանում, մարդիկ իրենց ամանորյա սեղանը լրացնում են աղցաններով և թխվածքաբլիթներով և ավելի շատ մտածում են լավ ժամանակ անցկացնելու մասին, ապա հայերիս մոտ Ամանորը վերածվում է` այսպես ասած` ուտելու տոնի:
Ավանդական խոզի բուդ, հնդկապավ, կոտլետներ հայկական թփով և պասուց դոլմա, տարատեսակ աղցաններ, բլինչիկ, իշլի քյուֆթա. սրանք պարտադիր ուտեստներն են, որոնց առկայությունը գրեթե բոլոր հայերի տոնական սեղանից անպակաս է: 
«Բա ո՞նց կլինի, ուրիշի սեղանին լինի, մերին` ոչ: Հարևանս ինձնից ինչո՞վ է լավը, որ մենք չունենանք: Բա ամոթ չի՞»... նման արտահայտություն կարելի է լսել ամեն երկրորդ կամ երրորդ հայի շուրթերից, ով շատ դեպքերում պարտքի տակ է ընկնում, վարկեր վերցնում, միայն թե հետ չմնա դիմացինից, իսկ հետո...
Այս ամենից հետո գալիս է ընտանեկան բյուջեի ճեղքվածք ու դաժան սնանկ հունվարը: Սա, իհարկե, ոչ բոլորին է վերաբերվում, բայց սա է ցավալի իրականությունը: Ամեն դեպքում, պետք է հիշել, որ Ամանորն իր հետ բերում է նոր երջանկություն, նոր սպասումներ, և որ ամենակարևորն է` գոնե այդ մի քանի օրերին կա հրաշքի ակնակալիք:

Slaq.am-ն իր ընթերցողներից հետաքրքրվեց, թե իրենց պատկերացմամբ ինչպիսի՞ն պետք է լինի հայկական ամանորյա սեղանը: Արդյո՞ք խոզի բուդը պարտադիր է: Նրանց պատասխանները ներկայացնում ենք ստորև.

Մարիա Պիրոյեվա-Իհարկե ոչ: Կապ չունի, թե ինչ ես դնելու սեղանին: Ամենակարևորը մթնոլորտն է և ընտանեկան ջերմությունը:

Մելանյա Հակոբյան- Ամեն տարի բոլորն ասում` չեն դնելու, բայց վերջում պարտաճանաչ ձևով առաջինը դա են դնում: Սիմվոլիկ է բուդը դարձել: Առանց դրա չի լինի:

Մարիա Սահակյան- Պարտադիր չէ: Պարտադիր է ջերմ ու մտերմիկ հյուրասիրությունը` իհարկե համեղ ուտեստները ներառյալ: Բայց միայն թե ոչ բուդ, դա շատ շաբլոն է:

Սիրան Պետրոսյան-Իհարկե ոչ: Կարելի է մեկ շիշ գինի, գեղեցիկ ձևավորված միրգ և խմորեղեն. այսինքն` ֆուրշետի գեղեցիկ սեղան... Եվ շատ բարձր տրամադրություն: Ահա տոնական սեղանը պատրաստ է, բարի ախորժակ և բարի տրամադրություն:

Թամարա Թադևոսյան-Ոչ պարտադիր չէ, պարտադիր է միայն բարձր տրամադրությունը:

Կարինե Վանյան-Տարին մեկ անգամ է էլի, թող լինի:

Տաթևիկ Սարգսյան-Առանց դրա մի տեսակ լիարժեք չի լինի, ուղղակի գյոռմամիշություն էլ պետք չի անել:

Հայաստան Հայա Գևորգյան- Ոչ, անգամ կարիքը չի զգացվում:

Ծովինար Գևորգյան- Պարտադիր չէ: Մենք չենք էլ դնելու: Բայց եթե ընտանիքը շատ է ուզում ավանդապաշտությունը շարունակի, ես բան չեմ ասի:

Հայկ Սանոյան-Խոզի բդի փոխարեն ավելի լավ կլինի շատ դոլմա լինի:

Արամ Սարգսյան- Միանշանակ խոզի բուդը պարտադիր է:

Թերեզա Գրիգորյան-Ամանորյա սեղանին, իմ կարծիքով, պետք է լինեն թեթև և համեղ ուտեստներ, ես կասեի` օրիգինալ ուտեստներ, սեղանը պետք է գեղեցիկ զարդարված լինի, ոչ թե ուտելիքները իրար գլխի լցված: Ամենակարևորը` այդ օրը տրամադրությունն է, իսկ խոզի բուդը պարտադիր չէ: Ես որ տանել չեմ կարողանում դա ու որ տեսնում եմ` ախորժակս փակվում է: