ՀՀ Սյունիքի մարզի ընդհանուր իրավասության դատարանը Վիլհելմ Ենգիբարյանին, Հրանտ Կարապետյանին և Ռոբերտ Բադալյանին դատապարտել է 5 տարվա ազատազրկման: Նրանց մեղադրանք է առաջադրվել այն բանի համար, որ նրանք, հանդիսանալով ենթասպա, կրտսեր սերժանտ և շարքային, կատարել են պաշտոնեական դիրքի չարաշահում և իշխանազանցություն, որն անզգուշությամբ առաջացրել է ծանր հետևանքներ, իսկ Ռ. Բադալյանը, խախտելով զինծառայողների փոխհարաբերությունների կանոնագրքային կանոնները, նրանց միջև ստորադասության հարաբերությաունների բացակայության պայմաններում բռնություն է գործադրել համածառայակցի նկատմամբ և առաջացրել առողջության թեթև վնաս:Այդ գործողությունները հանգեցրել են զինծառայողի կողմից ինքնասպանություն գործելուն:

Դատարանը հաստատված է համարել, որ ամբաստանյալ` Վ. Ենգիբարյանը ծառայելով N զորամասում, որպես վաշտի ավագ, կոչումով ենթասպա, հանդիսանալով պաշտոնատար անձ, իր ստորադրյալ` նույն վաշտի 2-րդ դասակի 3-րդ ջոկի ժամկետային զինծառայող, շարքային Թ. Սարուխանյանի կողմից իր դիտողությունների վերաբերյալ զորամասի իրային ծառայության պետ, կապիտան Է. Գրիգորյանին գանգատվելու առիթով, 2011թ. հունվարի 23-ին ժամը 20:30-21:00-ի սահմաններում, սպայական սենյակ է կանչել այսպես ասած «հեղինակություն» ունեցող նույն վաշտի հրամանատար, կրտսեր սերժանտ Հ. Կարապետյանին և նույն վաշտի շարքային Ռ. Բադալյանին և հայտնել վերոհիշյալ հանգամանքների մասին:

Հ. Կարապետյանը և Ռ. Բադալյանը արտահայտվել են, որ դա «բ...ն» է, որից հետո հանցավոր համաձայնության գալով վերջիններիս հետ, Թ. Սարուխանյանի սպայական սենյակ մտնելուց հետո սկսել են պարզաբանումները, որի ընթացքում Թ. Սարուխանյանը բացատրել է, որ Վ. Ենգիբարյանի դիտողություններից նեղվել է և հայտնել սպա Է. Գրիգորյանին:

Վ. Ենգիբարյանը չարաշահելով իր պաշտոնեական դիրքը, հակառակ զինվորական ծառայության շահերի, կատարելով իշխանազանցություն, հաշվեհարդար տեսնելու անձնական շահագրգռվածությունից ելնելով, կրտսեր սերժանտ Հ. Կարապետյանի և շարքային Ռ. Բադալյանի հետ բռնություն գործադրելով Թ. Սարուխանյանի նկատմամբ, հարվածներ են հասցրել նրան, անվանել «բ.զ» և արածը` «բ...ն»` ստորացնելով նրա պատիվն ու արժանապատվությունը, նվաստացրել և միջանցքում գտնվող զինվորների ներկայությամբ նշավակել նրան որպես «բ...զ»` մատնիչ:

Բացի այդ, տարբեր առիթներով հանդիպելով իր ենթակա, ծառայողական կախվածության մեջ գտնվող շարքային Թ. Սարուխանյանին, շարունակելով չարաշահել պաշտոնեական դիրքը, ցինիկ վերաբերմունք դրսևորելով, համածառայողների շրջանում պարբերաբար, անհիմն ստորացրել է նրա պատիվն ու արժանապատվությունը, զրպարտել Թ. Սարուխանյանին մատնություն կատարելու համար, որի հետևանքով վերջինս այլևս չդիմանալով իր նկատմամբ բազմիցս գործադրված ստորացուցիչ հալածանքներին, 2011թ. փետրվարի 12-ին գտնվելով պահակային ծառայության մեջ, ժամը 16:35-ին 4-րդ պահակակետում իրեն ամրակցված ինքնաձիգից կրծքավանդակի ձախ շրջանում մեկ կրակոց է արձակել և ինքնասպան եղել: Վ. Ենգիբարյանի կողմից պաշտոնեական դիրքի չարաշահումը և իշխանազանցությունը անզգուշությամբ առաջացրել են ծանր հետևանքներ:

Ամբաստանյալները ՀՀ քրեական և զինվորական վերաքննիչ դատարան բողոք են ներկայացրել` բեկանել և փոփոխել ՀՀ Սյունիքի մարզի ընդհանուր իրավասության դատարանի որոշումը և ազատել պատժի կրումից: Մեղքը ապացուցված գտնելու դեպքում նշանակել նվազագույն պատժաչափ և կիրառել ՀՀ քր.օր. 70 հոդ.:

Գործով նշանակվել է դատական քննություն:

 

Aysor.am