22-ամյա Արման Գիվարգիզովն, օգտագործելով 18 տարին չլրացած` Արարատ Կ-ի, Միսակ Բ-ի եւ Վռամ Ղ-ի` ծնողական հսկողությունից դուրս մնալու եւ փողոցում հայտնվելու առումով վերջիններիս վիճակի խոցելիությունը հավաքագրել եւ օգտագործել է մուրացկանության մեջ: Կենտրոն եւ Նորք-Մարաշ վարչական շրջանների ընդհանուր իրավասության դատարանից NEWS.am-ը տեղեկացավ, որ սույն գործը քննվելու է իրենց մոտ:

Գործի նյութերի համաձայն՝ 22-ամյա Արման Գիվարգիզովը 2013թ. հունվարին, խաբեությամբ` հետագայում բարեկեցիկ կյանքով ապահովելու, նյութական վիճակը բարելավելու եւ այլ կեղծ խոստումներով, մուրացկանությամբ զբաղվելու համար հավաքագրել է նծված երեխաներին, նրանց դրել եւ պահել է շահագործման մեջ` ստանալով եւ տնօրինելով Երեւանի տարբեր փողոցներում վերջիններիս կողմից մուրացկանությամբ վաստակած գումարները:

18-ամյա Ալբերտ Հովհաննիսյանին էլ մեղադրանք է առաջադրվել այն բանի համար, որ նա անչափահասներ Միսակ Բ.-ի եւ Արարատ Կ.-ի հետ, նախնական համաձայնությամբ, ներգրավվել եւ մասնակցել է Արման Գիվարգիզովի կողմից կազմակերպված` Երեւանի Նոր Արեշ 46 փող. 76 հասցեում գտնվող ավտոտեխսպասարկման կետից ուրիշի զգալի չափերով գույքի գողությունը:

Արման Գիվարգիզովի դեմ քրեական գործ է հարուցվել 132.2 հոդվածի 2-րդ մասի 1-ին կետով (շահագործման նպատակով երեխային, հոգեկան խանգարման հետեւանքով իր արարքի բնույթն ու նշանակությունը ամբողջությամբ կամ մասամբ գիտակցելու կամ դա ղեկավարելու հնարավորությունից զրկված անձի թրաֆիքինգը կամ շահագործումը, որը կատարվել է երկու կամ ավելի անձանց նկատմամբ): Սույն հոդվածը պատժվում է ազատազրկմամբ՝ 10-12 տարի ժամկետով:

Քրեական գործ է հարուցվել 165 հոդվածի 1-ին մասով (18 տարին լրացած անձի կողմից տվյալ հանցագործության համար սույն օրենսգրքով քրեական պատասխանատվության տարիքի հասած անչափահասին խոստումներ տալու, խաբեության կամ այլ եղանակով հանցանքի կատարմանը ներգրավելը) պատժվում է ազատազրկմամբ` 1-5 տարի ժամկետով: Ինչպես նաեւ 38-177 հոդվածի 2-րդ մասի 1, 3 կետերով (գողության հանցակից, որը կատարվել է մի խումբ անձանց կողմից նախնական համաձայնությամբ պահեստարան կամ շինություն ապօրինի մուտք գործելով): Սույն հոդվածը պատժվում է տուգանքով` նվազագույն աշխատավարձի 500-1000-պատիկի չափով, կամ ազատազրկմամբ` 2-5 տարի ժամկետով: Խափանման միջոց ընտրվել է կալանավորումը:

Ալբերտ Հովհաննիսյանի դեմ էլ քրեական գործ է հարուցվել 177 հոդվածի 2-րդ մասի 1,3 կետերով: Խափանման միջոց է ընտրվել չհեռանալու ստորագրությունը:

Գործը դատարան է ստացվել օգոստոսի 8-ին: Առաջիկայում կնշանակվի դատական քննության օրը: