28-ամյա հայը սպանել է Գլենդելի բնակչին` վերջինիս ոչ ավանդական կողմնորոշման համար:

Գլենդելի բնակիչ Ջոշուա Ուեսթի սպանության մեջ մեղադրվող 28-ամյա Խաչիկ Մասկովյանը սպանել է նրան, որովհետև Ուեսթը համասեռամոլ է եղել:

Մասկովյանը ձերբակալվել է ապրիլի 26-ին` Ջոշուա Ուեսթի մարմինը հայտնաբերելուց երկու օր անց:

Տարածքային դատախազության գրասենյակի մամուլի խոսնակ Ջեյն Ռոբինսոնը նշել է, որ սպանությունը տեղի է ունեցել ատելության հողի վրա:

Մասկովյանը նաև մեղադրվում է սպանությունից առաջ Ուեսթին առևանգելու մեջ:

Ուեսթի քույրը` Էրիկա Գեմբլն ասել է, որ կատարվածը շատ տխուր և ցավալի է:

Ըստ Գեմբլի` Մասկովյանը ինչ-որ կապ է ունեցել կամ ճանաչել է Ուեսթի ընկերոջը:

Քննիչները մի քանի մանրամասներ են ներկայացրել Ուեսթի մահվանից:

Սպանության գիշերը Մասկովյանը գնացել է Ուեսթին օգնելու նորոգել բջջային հեռախոսը: Այնուհետև նա սկսել է ծեծել Ուեսթին, դրել նրան քարշակ մեքենայի մեջ և լքել տարածքը:

Քիչ անց ոստիկանությունը ահազանգ է ստացել Վայնդեյլ փողոցում հնչած կրակոցների մասին: Դեպքի վայրում ոստիկանները արյուն և այլ ապացույցներ են հայտնաբերել: Այնուհետև մեկ այլ զանգ են ստացել` Պենրոզ փողոցում հնչած մի քանի կրակոցների մասին:

Նրանք ժամանել են դեպքի վայր և հայտնաբերել Ուեսթի մարմինը` հրազենային բազմաթիվ վնասվածքներով: Նա ընկած է եղել ճանապարհին: Ականատեսները տեսել են, թե ինչպես է Մասկովյանը գցում Ուեսթին ճանապարհին և հեռանում: