Պայմանագրային զինծառայող Էլչին Օրուջեւի մահը բազմաթիվ հարցեր է առաջացրել հենց Ադրբեջանում: Փորձագետները հարց են  տալիս` ի՞նչ հանգամանքներում է զոհվել Օրուջեւը:

Ըստ ադրբեջանական լրատվամիջոցների` 21-ամյա Օրուջեւ Էլչին Ռագուֆ օղլին վիրավորվել էր հուլիսի 15-ի լույս 16-ի գիշերը:

Ըստ ընտանիքի անդամների` ժամը 22.00-ին նա զանգահարել էր եղբորը եւ հորը եւ  ասել, որ վիրավոր է եւ գտնվում է չեզոք տարածքում: Երկու օրվա ընթացքում  կորած զինծառայողի որոնումներն իբր արդյունք չէին տվել: Նախօրեին Օրուջեւի մարմինը հայտնաբերվել եւ հանձնվել էր ընտանիքին`  հայրենի Սեյդիմլի գյուղում հուղարկավորելու համար: Մինդեռ երեկ Պաշտպանության նախարարությունը եւս ընտրել էր լռության մարտավարությունը, եւ օրվա ընթացքում անհնար էր զանգել երկրի պաշտպանության գերատեսչության մամուլի ծառայություն, գրում է  Բաքվի «Էխո» թերթը:

Հրատարակչության հետ զրույցում ռազմական փորձագետ Ուզեիր Ջաֆարովը հայտնել է, որ պաշտպանության նախարարությունն ստիպված է լռում, քանի որ այլ տարբերակ չունի: «Առաջին հերթին` ինչպե՞ս է զինծառայողը միայնակ հայտնվել չեզոք տարածքում:

Մոլորվե՞լ էր, թե՞ որեւէ մարտական առաջադրանք էր կատարում: Այդ հարցին պատասխան չկա: Ինչո՞ւ նրա ծառայակիցները եւ զորամասի հրամանատարությունը չէին կարողանոմ նրան գտնել երկու օրվա ընթացքում: Եթե նույնիսկ գոտին հրաձգության տակ էր գտնվում, կարելի էր դիմել ԵԱՀԿ նախագահի  նեկայացուցիչ Անջեյ Կասպրշիկին անձամբ, որպեսզի հայկական կողմը դադարեցնի կրակոցները: Մի խոսքով, այստեղ բազմաթիվ բացթողումներ կան, այդ թվում հրամանատարության կողմից, որը թույլ է տվել նման իրավիճակ», - նշել է փորձագետը:

«Երեւի աղմուկն էլ ավելի կուժգնանա, քանի որ ր նրա եղբայրը հայտնել էր, որ նա գտնվել է հայկական  դիրքերում: Այսինքն` զինվորը գտնվել է ոչ չեզոք տարածքում: Շատ հարցեր կան, որոնցում պաշտոնատար անձինք պետք է ճշգրտություն մտցնեն», - հայտարարել է Ջաֆարովը:

Նշենք, որ ըստ ադրբեջանական կողմի` Օրուջեւի  մահացած ուղղությունը հունիսին Ադրբեջանի կողմից սադրիչ գործողությունների կենտրոններից մեկն էր եղել: