Տալլին քաղաքի շրջանային դատարանի որոշմամբ բանտը, որտեղ կինը կրելիս է եղել իր պատիժը, այժմ պետք է տուժած կողմին վճարի 200 եվրո փոխհատուցում:

Այս որոշումը կայացվել է արդեն դատական երկրորդ ատյանում: Ավելի վաղ աղմուկ հանած գործը քննել էր Տալինի վարչական դատարանը, որը արձանագրել էր, որ բանտի աշխատակիցները կոպիտ խախտում են կատարել: Դատարանը մեկնաբանության մեջ նշել էր, որ «Հայտնի իրավիճակ է, որ միայն մերկ տեսքով հակառակ սեռի քննիչի մոտ գտնվելը միջազգային հանրության կողմից դիտարկվում է, որպես մարդու արժանապատվության նվաստացում և խոշտանգում»:

Առաջին ատյանի դատարանը բանտին պարտավորեցրել էր, որպես փոխհատուցում, վճարել տուժած կողմի պահանջածին համապատասխան գումար՝ 700 եվրո: Սակայն բանտն այդ որոշումը բողոքարկեց և հասավ իր համար ֆինանսական առումով համեմատաբար մեղմ դատավճռի: Երկրորդ ատյանի դատարանը նշել էր, որ «ընդհատված տեսակցությունը չի եղել բավարար չափով ծանր և կանխամտածված» և նվազեցրել էր փոխհատուցման գումարի չափը:

Կինը դատապարտվել էր խանութում կատարած գողության համար: Բանտում, ժամանակ առ ժամանակ նրա մոտ, այսպես կոչված, երկարատև տեսակցության էր գալիս ամուսինը:

Այդպիսի տեսակցություններից մեկի ժամանակ, երբ ամուսինները ինտիմ հարաբերությունների մեջ էին, առանց զգուշացնելու նրանց տեսակցության սենյակ են ներխուժել բանտի մի քանի աշխատակիցներ և սկսել տակնուվրա անել ամեն ինչ՝ թմրանյութ փնտրելու պատճառաբանությամբ:

«Նրանք իրավունք չունեին այդպես վարվելու: Նրանք կարող են խուզարկել տեսակցությունից առաջ կամ հետո», պնդել է տուժող կողմը:

Բանտի վարչակազմը այս ամենի մեջ իրեն մեղավոր չի ճանաչում:

Տուժած կողմի ասելով՝ այսպիսի իրավիճակում են հայտնվել նաև ուրիշ դատապարտյալներ: Ըստ նրա բանտում ինչ-որ ցանկանում, այն էլ անում են: «Պարզապես ոչ մեկը չի բողոքում, քանի որ բոլորն էլ վախենում են, որ այդպես չեն հասնի պայմանական վաղաժամկետ ազատման»: Իսկ ինքն այդպիսի քայլի է դիմել, քանի որ իր պատժի ժամկետը արդեն մոտենում էր ավարտին:

pastinfo.am