Բելգիահայ R&B ոճի երգչուհի Կարինե Օհանյանն օրերս մասնավոր այցով Հայաստանում էր, որի ընթացքում NEWS.am-ը հարցազրույց վերցրեց Կարինեից, ով վերջին մեկ տարում նշանակալի հաջողություններ է ուեցել կարիերայիում։ Հոկտեմբերին կկայանա Կարինեի եւ Ron Caroll-ի համատեղ տեսահոլովակի պրեմիերան, իսկ հաջորդ նախատեսվում է Կարինեի դերասանական դեբյուտը։ Նա հանդես է գալու եվրոպական արտադրության կենսագրական թրիլլերում՝ գլխավոր դերերում։ Ըստ ամենայնի՝ բելգիական ամենահայտնի գանգստերի կյանքի մասին պատմող ֆիլմը բեսթսելլեր դառնալու հավականություններ կունենա։ Ի դեպ Կարինեն խաղալու է գանգսթերի կնոջ դերը։ Հայաստան կարճաժամկետ այցի ընթացքում բելգիահայ երգչուհուն եւս համագործակցության առաջարկներ են եղել։ Մասնավորապես՝ նա ամենայն հավանականությամբ կհամագործակցի «Con alma» ջազ բենդի հետ։ Ընթերցողին ենք ներկայացնում հարցազրույցն ամբողջությամբ։

Մոտ տասը տարի է Հայաստանում չէիր եղել։ Կպատմես, ինչպե՞ս ես քեզ հիմա զգում Հայաստանում։ Ի՞նչ փոփոխություններ ես տեսնում, եւ բացի դրանից, ճիշտ է մասնավոր այցով ես եկել, բայց եղե՞լ են արդյոք հանդիպումներ տեղական շոուբիզնեսի ներկայացուցիչների հետ։

Հայաստանից տպավորությունը շատ լավն է, մանավանդ, որ շատ բաներ փոխվել են։ Փողոցները, օդանավակայանը, որ իջնում ես ամեն ինչ վերանորոգված ու նոր է։ Մարդիկ էլ են փոխվել։ Ավելի շատ են ժպտում։

Եկել էի հարսանիքի արարողության մասնակցելու, բայց իհարկե հարցազրույցներ եմ տվել։ Ձեր հետ խոսելուց հետո եւս մեկ լուսանկարահանման պետք է մասնակցեմ։ Ժամանակը շատ քիչ էր ինձ համար։ 10 տարի անց 10 օրով եմ եկել։ Այնքան շատ անելիքներ կան, հարազատներիս պետք է տեսնեի։ Բայց շատ լավ անցավ։ Ցավոք սրտի այսօր պետք է վերադառնամ Բելգիա։

Իսկ այս տարվա ընթացքում ինչպիսի՞ նորություններ եղան քո կարիերայում։ Գիտեմ, որ պետք է նոր պայմանագրեր կնքեիր, նոր պրոդյուսերներ պետք է զբաղվեին քո կարիերայով։ Այս մասով նորություններ կա՞ն։

Ես շատ դրական էի տրամադրված, ու ինձ թվում էր, որ ամեն ինչ արագ կլինի։ Բայց երկու ամիս առաջ Ամերիկա այցելեցի ու այնտեղ նոր պայմանագիր եմ ստորագրել։ Հոկտեմբերին դուրս կգա իմ նոր տեսահոլովակը, որը Ռոն Կարոլի հետ է նկարվել։

Քո երգերը դո՞ւ ես գրում։

Այո, բառերն ու մեղեդին ես եմ գրում։ Իսկ պրոդյուսերս նախկինի պես, բելգիայի լավագույն պրոդյուսերներից մեկն է՝ Գի Վաքուն։ Ամերիկայում տարբեր պրոդյուսերների հետ աշխատեցի։ Ճիշտ է անգլերեն լավ եմ խոսում, բայց միեւնույն է սխալներ անում եմ։ Ընդհանրապես մի քանի լեզվով խոսում եմ, բայց ոչ մեկն էլ շատ լավ չեմ տիրապետում։

Իսկ քո երաժշտությունը ինչպիսի՞ն է։ Կբնութագրե՞ս։

Սիրում եմ բալլադներ կամ դանդաղ երգեր, բայց առաջին երեք երգերը, որ շուտով կհրապարակվեն, ավելի շատ R&B եւ փոփ ժանրի են։ Կարելի է ասել ռադիոյի եւ ակումբների համար նախատեսված երգեր եւ երաժշտություն են իմ հեղինակածները։

Մենք համաշխարհային ճանաչում ունեցող մի քանի երգիչներ ունենք, որոնց երգերի մեջ կարելի է նշմարել հայկական մեղեդայնություն։ Քո երգերում կարե՞լի է նույնը նկատել։

Շատ են ասում, որ երգելուս ոճը, ձայնիս մեջ ինչ որ հայկական երանգ կա, դա անկախ ինձնից է ստացվում։

Ինքս շատ եմ մտածում, որ երգերիս մեջ ինչ որ հայկական բառ օգտագործեմ, որ հեշտ հիշվող կլինի, ու երկրպագուները այն կարող են կրկնել։

Ամերիկայում հանդիպումների ընթացքում, ինչպիսի՞ նոր առաջարկներ ստացար։

Ես հանդիպելու էի Ռոն Քարոլին։ Բայց բավականին շատ մարդկանց հետ հանդիպեցի եւ հաջորդ պրոդյուսերը, որ պետք է համագործակցեմ, բավականին հայտնի է, բայց չեմ կարող այժմ բացահայտեմ։

Իսկ բացի տեսահոլովակից ու երգերից, որ հոկտեմբերին են հրապարակվելու, ի՞նչ նոր նախագծեր կան։

Բելգիայում այժմ զբաղվում եմ տարբեր բրենդերի ներկայացմամբ։ Հատկապես, երբ իմացան որ ԱՄՆ հետ պայմանագիր ունեմ ավելի ակտիվացան։ Շատ ուրախ եմ, որ հավատում են, որ հաջողության կհասնեմ։ Անհամբեր սպասում եմ, որ տեսահոլովակս դուրս գա, ու տեսնեմ ինչպիսի ազդեցություն կունենա։

Մինչեւ երաժշտական կարիերայիդ անցնելը, դու բավականին հաջողակ էիր նորաձեւոթյունում, եւ կարելի է ասել նշանակալի արդյունքի հասած մոդել էիր։ Այժմ ամբողջությամբ թողե՞լ ես այդ աշխատանքը։

Ոչ, մինչեւ այժմ զբաղվում եմ։ Ինձ թվում է, երբեք չի լինի դա թողնել, քանի որ բոլոր բոլոր դերասաններն ու երգիչներն էլ ինչ որ մի բրենդի դեմք են դառնում։ Ճիշտ է, այժմ ավելի շատ զբաղվում եմ երաժշտությամբ, բայց երբեք չեմ թողնի նորաձեւությունը, որովհետեւ շատ եմ սիրում այդ աշխատանքը, եւ երեւի այդ պատճառով էլ չկարողանամ թողնել այն։

Հիմա ո՞ր բրենդերի հետ ես աշխատում։

Այժմ ամենամեծ բրենդը որ աշխատում եմ, զբաղվում է աքդամանդագործությամբ եւ զարդերի արտադրությամբ։ Բելգիայում համար առաջին բրենդերից մեկն է։ բայց էլի շատ բրենդեր կան, որոնց հետ աշխատում եմ, ու կարճ ժամանակահատվածում պայմանագրեր եմ կնքել։

Ժամանակին ինքդ էլ զբաղվում էիր կազմակերպչական աշխատանքով։ Մասնավորապես Բելգիայում հայ երեխաների համար մրցույթներ էիր կազմակերպում։ Շարունակո՞ւմ ես կազմակերպչական գործունեությունդ։

Երկու տարի է արդեն չեմ զբաղվում։ Բայց դրանից առաջ կազմակերպում էի «Միսս լիթլ Արմենիա» մրցույթը։ Մրցույթի նպատակը, ոչ թե ամենագեղեցիկին ընտրելը, այլ երեխաների մեջ տաղանդներ գտնելն էր։ Ինձ թվում է, հետագայում էլի նման բաներ կկազմակերպեմ։

Հնարավոր է գաղտնի տեղեկության մասին եմ հարցնում, սակայն ամեն դեպքում, Ամերիկայում հանդիպումների ընթացքում, մասնավորապես Հոլիվուդում կայացած հանդիպումներում, ֆիլմերում նկարահանվելու առաջարկներ ստացա՞ր։

Ճիշտն ասած Բելգիայում մեծ նախագծեր կան։ Անուններ չեմ կարող ասել, բայց նշեմ, որ նկարահանվելու եմ մի ֆիլմում, որը բելգիացի հայտնի գանգսթերի մասին է։ Խաղալու եմ հանցագործի կնոջ դերը։ Խաղընկերս շատ հայտնի դերասան է լինելու՝ նա գանգսթերի դերում է։ Չեմ կարող անունը նշել, բայց նա Կաննի կինոփառատոնի եւ Օսկարի նոմինացիայի է ներկայացվել։ Այնպես որ, դա ինձ համար շատ մեծ քայլ է։

Իսկ պրեմիերան ե՞րբ է նախատեսված։

Գիրքը լույս կտեսնի սեպտեմբերի 13-ին, իսկ 2013-ի կեսերին նախատեսվում է ֆիլմի նկարահանումը։

Ֆիլմը ֆրանսերեն է նկարահանվելու, եւ ես հիմա արդեն ֆրանսերենիս կատարելագործման վրա եմ նաեւ աշխատում։ Ճիշտն ասած, սրանից առաջ ես միայն գովազդներում եմ նկարահանվել, եւ սա փաստորեն կլինի իմ դերասանական դեբյուտը։