Տարիներ առաջ, երբ հեռուստատեսությամբ մարմնավաճառության մասին հաղորդում էր լինում, որտեղ մարմնավաճառը պատմում էր` ինչու է այդ քայլին դիմել, մեր զրուցակիցը` Սոնան (անունը փոխված է), զայրանում էր, ալիքը փոխում, չէր հանդուրժում նման վարքի տեր կանանց: Այժմ ամեն ինչ այլ է. այժմ նա է այդ գործով զբաղվում` իր մասին տեղեկացնելով համացանցում` ծանոթությունների կայքերում:

Մեզ հետ զրույցում Սոնան ասաց, որ արդեն 4-5 ամիս ինտիմ ծառայություններ է մատուցում. ճարահատյալ է գնացել այդ քայլին: ''Երկու երեխա ունեմ, վարձով ենք ապրում: Միայն 70.000 դրամ տան վարձ եմ տալիս, էլ չեմ ասում աղջկաս ուսման վարձը` տարեկան 180.000 դրամ, իսկ եթե որևէ խանութում կամ ճաշարանում օրական 2000 դրամով աշխատեի, չէի հասցնի, այդ գումարը նույնիսկ օրվա սննդի փողը չէր հանի'',- ասաց նա:

Սոնայի ամուսինը կալանավայրում է. կինը չցանկացավ խոսել ոչ ամուսնու, ոչ էլ նրա հանցանքի մասին, միայն ասաց, որ երեխաներին պահելու համար ամեն ինչ կանի. ''Օրը մեկ կամ շաբաթը մեկ հաստատ պատվեր ունենում եմ: Դե նայեք, հյուրանոց ենք գնում ու այդ օրն արդեն 25.000 դրամ ունեմ ու կարող եմ ասել, որ ինչ-որ ձևով ընտանիքիս կարիքները հոգում եմ, լավ է...: Կլիենտներս հիմնականում հայ տղամարդիկ են…խնդիրներ չեն լինում, կարևորն այն է, որ ինձ չեն վիրավորում, չեմ նեղվում, վերաբերմունքը նրանց նվաստացնող չէ'',- հավելեց նա:

Սոնան ասաց, որ երեխաները չգիտեն իր գործի մասին. երեկոյան դուրս է գալիս տանից, ասում` աշխատանքի է գնում ու վերջ. ''Գաղտնի եմ պահում, այլ կերպ չեմ կարող: Մեկ անգամ ասել եմ գործի եմ գնում, իրենք էլ գիտեն` ինչ-որ տեղ եմ աշխատում ու հարցեր չեն տալիս'',- ասաց նա` նշելով, թե դեռ չգիտի` մինչև երբ է այսպես շարունակվելու:

mamul.am