Գյումրեցի 20-ամյա Աստղիկի /անունը փոխված է/ հայրը բռնաբարել է նրան, սակայն հետո նա ծանոթացել է մի երիտասարդի հետ, ով, տեղյակ լինելով այդ մասին, ամուսնացել է իր հետ: Այս մասին NEWS.am-ի թղթակցի հետ զրույցում պատմեց Աստղիկը: Մինչեւ մանրամասներին անցնելն, Աստղիկը պատմեց, որ ճակատագիրը իր հետ դաժան է վարվել, երբ ինքը դեռ 4 տարեկան էր:1988թ-ի երկրաշարժը խլել է 4-ամյա Աստղիկի մոր կյանքը, իսկ հորը որոշ ժամանակ անց ձերբակալել են եւ դատապարտել 10 տարվա ազատազրկման: Այդ տարիների ընթացքում նրան խնամել է մայրական տատը: 10 տարի անց, երբ նրա հայրը ազատ է արձակվել քրեակատարողական հիմնարկից, գնացել է Աստղիկին տուն տանելու:

«Բայց ես ճնշվում էի նրա ներկայությունից, քանի որ նա տարօրինակ հայացքներ էր նետում իմ ուղղությամբ: Տատիկիս խնդրեցի թույլ չտալ, որ հայրս ինձ տանի իր հետ, սակայն հայր կոչեցյալս սպառնաց, որ հակառակվելու դեպքում կսպանի տատիկիս եւ նորից կգնա կնստի»,- մանրամասնեց Աստղիկը:

Հոր հետ ապրելուց որոշ ժամանակ անց հայրը քնաբերով թեյ է տվել աղջկան եւ բռնաբարել նրան: «Դա երկրորդ դաժան հարվածն էր, որ ստացա ճակատագրից: Նրան իր կատարած արարքի համար դատապարտեցին եւ մեկ տարի անց բանտում սպանեցին: Իմ հոգեկան աշխարհը խառնվել էր իրար: Չեմ կարող նկարագրել այն ապրումները, որ ունեցել եմ: Ես խուսափում էի մարդկանցից, հատկապես հակառակ սեռի ներկայացուցիչներից: Նրանց մեջ տեսնում էի բռնացողի ու գազանի»,- անկեղծացավ Աստղիկը:

Բարեբախտաբար տարիներ անց Աստղիկը հանդիպել է մի մարդու, ով իմանալով հանդերձ նրա հետ կատարվածի մասին, ամուսնության առաջարկություն է արել: «Քիչ-քիչ նրան ճանաչելով ընկերացա, մտերմացա եւ սկսեցի սիրել: Բարեբախտաբար ես հասկացա, որ ընտրությանս մեջ չեմ սխալվել: Հիմա փորձում եմ ճաշակել երջանկության քաղցրությունը, որը պարգեւել է ինձ բալիկս»,- եզրափակեց Աստղիկը:

Վերջինս հոգեբանական եւ իրավական մեջ աջակցություն է  ստացել Կանանց իրավունքների կենտրոնից:

Հ.Գ. Բոլոր այն կանայք, ովքեր ենթարկվում են ֆիզիկական, տնտեսական կամ հոգեբանական բռնության օգնություն ստանալու համար կարող են դիմել Կանանց իրավունքների կենտրոնի անվճար հետեւյալ թեժ գծին` 54 28 28: