Իսրայելից շուրջ 2 կգ արհեստական սերմնահեղուկ ներմուծելու մասին լուրերը չեն համապատասխանում իրականությանը, դրանք պարզապես աբսուրդ են: Այս մասին այսօր ասուլիսում ասաց Մոր և մանկան առողջության պահպանման գիտահետազոտական կենտրոնի տնօրեն Գեորգի Օկոևը:

Հիշեցնենք, որ օրերս այդ մասին բարձրաձայնել էր ԱԺ պատգամավոր Արծվիկ Մինասյանը` նշելով, որ մաքսային ծառայությունից տվյալներ ունի, համաձայն որոնց 2011 թ. Հայաստան է ներմուծվել մեծաքանակ սերմնահեղուկ Իսրայելից:

Գեորգի Օկոևը նշեց, որ իրականում 2011թ. գրանցվել է մի դեպք, երբ Ավտրալիայից արտասահմանցի ամուսինը, ով աշխատանքից ելնելով չէր կարող գալ Հայաստան իր կնոջ մոտ, որոշել է իր սերմնահեղուկը նրան ուղարկել` վերջինիս բեղմնավորման նպատակով:

Խորհրդակցելով թե’ Հայաստանի, և թե’ Ավստրալիայի բժիշկների հետ` նա սառեցրած իր սերմնահեղուկը ուղարկել է Հայաստան: Օկոևի խոսքերով, Հայաստան ուղարկված սերմնահեղուկը եղել է ոչ թե 2 լիտր, այլ ընդամենը1.7մլ:

«Նման խոսակցությունների պատճառն այն է, որ այդ սերմնահեղուկը պահվել է 2 լիտրանոց ազոտի մեջ»,- ընդգծեց բժիշկը:

Ի վերջո, Ավստրալիայից ուղարկված սերմնահեղուկից կինը հղիացել է:

Մոտավոր հաշվարկով, ըստ Օկոևի, 2 կիլոգրամ սերմնահեղուկից կարող է բեղմնավորվել շուրջ 1200 հոգի:

Նա նշեց, որ նախկինում չեն գրանցվել դեպքեր, երբ այլ երկրից Հայաստան սերմնահեղուկ է ներմուծվել: