Հոկտեմբերի 18-ին Արագածոտնի մարզի  Մուղնի գյուղի 14-րդ  դարի Սուրբ Գեւորգ  եկեղեցում տեղի է ունեցել Հռիփսիմե Խուրշուդյանի եւ Տարոն Թովմասյանի պսակադրությունը: «Ես չեմ վախենում, սակայն, եթե խոստովանեմ, ավելի շատ եմ հուզված, քան ծանրաձողը բարձրացնելիս», - մինչեւ պսկադրության սկիզբը NEWS.am.STYLE-ի թղթակցին ասել է Հռիփսիմեն,- «Ես ու Տարոնը իրար ճանաչում ենք ողջ կյանքում։ Հաճախել ենք  միեւնույն սպորտային եւ միջնակարգ դպրոցները, մշտապես ընկերներ ենք եղել, հյուր ենք գնացել: Այսպես շարունակվել է մինչեւ 2007 թ-ը, երբ զգացմունքները հասունացել են եւ մենք զույգ ենք դարձել»:

Երիտասարդներին պսակադրել է Տեր Եղիշեն քահանան, ով, երիտասարդներին պատմելով ընտանեկան կյանքի համար զոհաբերության անհրաժեշտության մասին, չզլացավ օրինակ բերել պրոֆեսիոնալ սպորտում հանդիպած դեպքեր: «Ես ամբողջ սրտով Հռիփսիմեին ցանկանում եմ այն, ինչ ես ինքս ինձ կցանկանայի: Կարծում եմ՝ ավելին դժվար է ցանկանալ»,- NEWS.am.STYLE-ի թղթակցին հայտնել է 2011թ. ծանրամարտի Եվրոպայի փոխչեմպիոն  Էլեն Գրիգորյանը:

Հիշեցնենք, որ այս տարի Հռիփսիմե Խուրշուդյանը Լոնդոնի Օլիմպիական խաղերում զբաղեցրել է պատվավոր երրորդ տեղը: Տարոն Թորոսյանը նույնպես ծանրորդ է:

NEWS.am STYLE