Գաղտնիք չէ, որ մուլտֆիլմերը բավական մեծ ազդեցություն են ունենում երեխաների ներաշխարհի վրա: Այս դեպքում շատ կարևոր է, թե մուլտֆիլմ արտադրողը ի՞նչ է փոխանցում երեխաներին, ի՞նչ է մտցնում նրանց մանկական հոգեբանության մեջ: Բազմաթիվ հոգեբաններ կան, ովքեր քննդատում են արևմտյան մուլտֆիլմերը և ահազանգում են, որ դրանք նկարահանվում են հատուկ փչացնելու մանուկների հեգեբանությունը: Այս թեմայի շուրջ Slaq.am-ը զրուցեց հոգեբան Աննա Բադալյանի հետ: «Նախ ասեմ, որ յուրաքանչյուր մանկիկ ունի իր ուրույն երևակայական աշխարհը ու այն անընդհատ թարմացվում է արտաքին ազդակների արդյունքում: Մուլտֆիլմն այդ պարագայում ունի ամենաուղիղ ազդեցությունը»,-ասաց հոգեբանը: Ըստ հոգեբանի՝ մուլտֆիլմերը կարող են կերտել հրաշալի մանկական կերպար և անել հակառակը. «Ամերիկյան և ոչ միայն... որոշ մուլտեր ունեն բավականին ագրեսիվ և դաժան սյուժեներ, որոնք բառիս բուն իմաստով խաթարում են մանկիկի առողջ հոգեկան զարգացումը: Արդյունքում փոքրիկը ունենում է նյարդային վարք և բավականին տագնապային հուզական ֆոն: Այդ առումով բավականին շատ հետազոտություններ կան և դրա մասին ասվել է բազմիցս, կուզեի միայն լրացնեմ, որ օտարամուտ մուլտերը նաև խաթարում են մանկիկի նոր արմատներ տվող էթնիկական ընկալումները»,-ասաց Աննա Բադալյանը: Հոգեբանը կարծում է, որ ծնողները պետք է իրենց երեխաներին պարուրեն գունեղ մանկությամբ և նրանց խորհուրդ է տալիս ուշադիր լինել, թե ինչ են դիտում իրենց երեխաները: