Որդեգրումը պատասխանատու քայլ է, որին համարձակվել են դիմել հոլիվուդյան որոշ աստղեր: NEWS.am STYLE-ը կազմել է հայտնի մարդկանց ցուցակ, ովքեր որդեգրած երեխաների են դաստիարակում:

Շարլիզ Թերոն

2012 թվականին երեխա է որդեգրել Հարավաֆրիկյան Հանրապետությունից, որին կոչել է Ջեքսոն: Որդեգրումից հետո դերասանուհին հայտարարեց. «Ուրախ եմ տեղեկացնել, որ այսուհետ ես Ջեքսոն անունով առողջ տղայի հպարտ մայրն եմ»:

Անջելինա Ջոլի

Դերասանուհին հայտնի է ոչ միայն իր գեղեցկությամբ եւ տաղանդով, այլեւ որպես բազմազավակ մայր: Ընտանեկան հարցերում Ջոլիին սատարում է ամուսինը՝ դերասան Բրեդ Փիթը: Զույգը երեք կենսաբանական եւ երեք որդեգրած երեխա ունի. Մեդոքսը (որդեգրվել է 2002 թվականին, Կամբոջայում, 7 ամսական տարիքում), Զախարան (6 ամսական աղջիկը որդեգրվել է 2005 թվականին, Եթովպիայում), Շայլոն (ծնվել է 2006 թվականին), Պաքսը (որդեգրվել է 2007 թվականին, Վիետնամում, 3 տարեկանում), երկվորյակներ Նոքս Լեոնը եւ Վիվիեն Մարշելինը (ծնվել են 2008 թվականին):

Սանդրա Բալոք

Հայտնի դերասանուհին որոշեց տղային որդեգրել 2010 թվականին, ամուսնու հետ բաժանվելուց հետո: Երեխայի անունը Լուիս Բորդո է: Դերասանուհու խոսքով, նա մի ամբողջ կարողություն է վատնում իր թանկարժեք հրաշքի համար:

Շերոն Սթոուն

2000 թվականին Շերոնն ու նրա ամուսին Ֆիլը որոշեցին որդեգրել Ռոան Ջոզեֆ Բրոնշթեյն անունով տղային: 2004 թվականին ամուսնալուծությունից հետո Շերոնը պայքարում էր երեխայի նկատմամբ խնամքի իրավունքի համար: 2005 թվականին Շերոնի կյանքում եւս մեկ որդի հայտնվեց՝ Լերդ Վոնը: 2006 թվականին համերաշխ ընտանիքին միացավ նաեւ Քուին Քելլին: Այսպիսով, մոլորակի ամենասեքսուալ կինը հիմա 3 որդի ունի:

Քրիսթին Դեւիս 

«Sex and the City» սերիալի հայտնի դերասանուհին 46 տարեկանում փոքրիկ աղջիկ որդեգրեց, ում դաստիարակությամբ զբաղվում է ինքնուրույն:

Մադոննա

Մադոննան 4 երեխա ունի. երկուսը՝ կենսաբանական (դուստր Լուրդեսը եւ որդի Ռոկոն) եւ երկուսը՝ որդեգրած (Դեւիդ Բենդան եւ Չիֆունդո Մերսի Ջեյմս Չիկոնեն):

NEWS.am STYLE