Ոստիկանության Քննչական գլխավոր վարչության Կոտայքի մարզի քննչական բաժնում հարուցվել է քրեական գործ՝ ՀՀ Քր. Օր.-ի 112 հոդվածի (Դիտավորությամբ առողջությանը ծանր վնաս պատճառելը) հատկանիշներով:

Նշված քրեական գործը հարուցվել է հուլիսի 27-ին Հրազդանի բժշկական կենտրոն տեղափոխված Կոտայքի մարզի Քաղսի գյուղի բնակչուհի 79-ամյա Տորիկ Գրիգորյանին մարմնական վնասվածք պատճառելու փաստով:

Ինչպես հայտնում է ֆոտոլրագրող Գագիկ Շամշյանը, այդ օրը հիվանդանոցից ահազանգել էին ոստիկանություն, որ աջ նախաբազկի զարկերակային կտրվածք ախտորոշմամբ շտապ օգնության բրիգադի կողմից հիվանդանոց է բերվել Տ. Գրիգորյանը, ով հիվանդանոց մեկնած ոստիկանության Հրազդանի բաժնի օպերատիվ-քննչական խմբին ի վիճակի չի եղել կատարվածի մասին տեղեկություններ տալու:

Ձեռնարկված օպերատիվ-հետախուզական և քննչական գործողությունների արդյունքում Հրազդանի ոստիկաններն ու Կոտայքի մարզի քննչական բաժնի աշխատակիցները պարզել են, որ կնոջը մարմնական վնասվածք պատճառել է ամուսինը՝ 81-ամյա Սոս Գրիգորյանը, ով այդ օրը լուսաբացին խոհանոցային դանակով ննջասենյակում կտրել է կնոջ նախաբազկի զարկերակը:

Ֆոտոլրագրողի տեղեկություններով ամուսինը, ով անդամալույծ է, քննիչի կողմից ստորագրությամբ ազատ է արձակվել:

shamshyan.com