Մնում է միայն փաթեթավորել ու գեղեցիկ ժապավենով կապել այդ ամենը:

Իսկ ինչպե՞ս վարվել առօրյա կյանքում: Թերևս, «երկրային» նվերների հարցում կարող են խնդիրներ ծագել:

Ոսկի՞, թե` զարդ...

Ինչպես պարզվում է, այդ խնդիրները բավականին լուրջ են: Բացենք մի մեծ գաղտնիք. նվերի ընտրությունն իսկական փորձություն է տղամարդու համար:

Նախ` ընտրել միառժամանակ և՛ տեղին, և՛ օրիգինալ բան, նրանք ի վիճակի չեն: Հարց է ծագում, իսկ ու՞ր մնաց այդքան գովելի տղամարդկային հնարամտությունը: Նվերներ մատուցելու վարպետության մեջ կանայք մի քանի անգամ գերազանցում են տղամարդկանց:

Ինչպե՞ս է սովորաբար վարվում տղամարդը: Տոնից մեկ օր առաջ (այո՛, այո,՛ դեկտեմբերի 30-ին, մարտի 7-ին) նա ուշքի է գալիս և սկսում հապճեպ գործել: Տղամարդը ոչ միայն գնում է նվերը վերջին օրը, այլև` ընտրում: Ահա նա կանգնած է խանութում և նրա ուղեղում միայն մի հարց է պտտվում. օծանելի՞ք, թե` զարդ: Շուրջբոլորն իր պես շփոթված տղամարդիկ են: Ամենայն հավանականությամբ, նրանք բոլորը երեկոյան տուն կվերադառնան նմանատիպ տուփերով: Զավեշտական տեսարան կստացվի, եթե բոլորի կանայք իրար հանդիպեն:

Մինչդեռ, կանայք նվերի ընտրությանը մոտենում են ամենայն լրջությամբ. ասես դա իրենց կյանքի ամենից կարևոր գործն է:Ուշադիր լսում են իրենց սիրած էակին, հիշում նրա ցանկությունները և, առիթի դեպքում, մատուցում համապատասխան նվեր: Սիրելին խոսքի մեջ հիշատակում է ինչ-որ ժամացույցի բրենդ և խնդրեմ` մի քանի ամիս անց ստանում այդ ժամացույցը ծննդյան տոնին: Կամ տրտնջում է անգլերենի իմացության ցածր մակարդակից, իսկ որևէ տոնի կապակցությամբ ստանում է արագ ուսուցման աուդիոկուրս, որպեսզի հնարավոր լինի լսել անգամ մեքենայի ղեկին:

«Անցած Նոր տարուն կինս ինձ ատաղձագործական գործիքների հավաքածու նվիրեց: Ես սկզբում զարմացա, քանի որ երբեք իմ ձեռքերով ոչինչ չեմ պատրաստել: Հետո հիշեցի, որ զրույցներից մեկի ժամանակ ասել եմ, որ կուզեի տան համար որևէ կահույք իմ ձեռքով սարքել: Սակայն դա ընդամենը վայրկենական պոռթկում էր. ասացի ու մոռացա: Մի կողմից, հաճելի է, որ նա այդքան ուշադիր է իմ բառերի հանդեպ, մյուս կողմից, եթե իմ ասած ամեն ցնադաբանություն լուրջ ընդունվի, մեր տունը շուտով կլցվի բազմաթիվ անպետք ու անօգուտ իրերով»:

Կարեն, 32 տ.

Նվերի ընտրությունը իրոք նուրբ հարց է: Կինը կարող է որպես անակնկալ մատուցել տղամարդու այն ցանկությունները, որոնց մասին անգամ նա է մոռացել: Մինչդեռ, ստացած նվերի կապակցությամբ հարկավոր է սրտանց ուրախություն արտահայտել աղջկան չվիրավորելու համար:

Տղամարդկանց համար ավելի դժվար է: Եթե անգամ նրանք համոզված են, որ պետքական նվեր են գնել, վերջում կարող է պարզվել, որ իրականում ոչինչ էլ չգիտեն ու ամեն ինչ սխալ են արել: Տղամարդկանց նվերների հարցում կողմնորոշվելը շատ պարզ է. գույնը`սև, ալկոհոլի աստիճանը` բարձր, գոտին` ամենահասարակ ճարմանդով, շապիկը` առանց ավելորդ գրվածքների:

Իսկ ինչպե՞ս կռահել աղջիկների ցանկությունները:

«Իմ ընկերուհին սիրում էր, երբ ես իրեն ներքնազգեստ էի նվիրում: Բայց նա, իհարկե, չէր կարող ամեն անգամ ինձ մանրամասն բացատրել իր ուզած ներքնազգեստի ձևն ու գույնը, այլապես դա արդեն կլիներ ոչ թե նվեր, այլ` պատվեր: Կրծկալի չափսը ես անգիր էի արել, իսկ ապահովության համար դարձրել էի այդ թվերը համակարգչիս գաղտնագիր: Սակայն, երբ վաճառողուհիները խանութում սկսում էին հարցեր տալ գույնի, ձևի, բացվածքի վերաբերյալ` խճճվում էի: Ամեն անգամ հուզվում էի նվիրելուց առաջ ու թեթևություն ապրում, եթե նա հավանում էր: Այդ պրոցեսն ինձնից շատ ջանք ու ժամանակ էր խլում»:

Ալբերտ, 31 տ.

Նույն խնդիրներն առաջանում են օծանելիքի, զարդի, հագուստի ընտրության հարցում: Հագուստի հետ կապված առանձին պատմություն է, քանի որ, եթե դուր չգալու հետ մեկտեղ այն նաև ավելի մեծ չափսի լինի, ապա տղամարդուն սպասվում է երկար հարցաքննություն` «ուրեմն դու գտնում ես, որ ես գե՞ր եմ» թեմայի շուրջ:

Անգամ ծաղկի հարցում ոչինչ հաստատուն չէ: Երեկ նա սիրում էր սպիտակ վարդեր, իսկ այսօր` բացառապես կարմիր:
«Ինչ լավ է, որ կան իմ գործընկերուհի Զառայի պես աղջիկներ: Նա հավաքում է փղիկներ, ուստի նվերի հարցում սխալվելն անհնարին է: Պետք է պահպանել ընդամենը երկու պայման. դա պետք է լինի փղիկ, և նորություն` իր հավաքածուի համար: Հաշվի առնելով, որ Զառան մշտապես թարմացնում է իր փղիկների ալբոմը սոց. կայքում. ամեն ինչ կարգին է: Ընկերները գիտեն, թե ինչ է ցանկանում Զառան, իսկ նա միշտ գոհ է մնում իր ստացած նվերներից:»

Միքայել, 27 տ.

Թերևս, տղամարդկանց հիմնական սխալը նվեր ընտրելու հարցում չափից դուրս հիմնավորված մոտեցումն է, նրանք ցանկանում են, որ նվերն աղջկան միառժամանակ զարմացնի, հիացնի, գոհացնի և լինի շատ օգտակար: Մինչդեռ, պետք է կենտրոնանալ որևէ առանձին կետի վրա:
Իհարկե, գլխավորը աղջկան հիացնելն է: Մենք միմյանց նվերներ ենք մատուցում նախևառաջ մեր սերն ու ուշադրությունը ցույց տալու համար, սակայն շատ հաճախ մոռանում ենք այդ մասին: Ըստ էության` այս պարզ օրենքին հետևելու դեպքում նվերները կդառնան և՛ հաճելի, և՛ ցանկալի: Ու ամենևին կարևոր չէ, արդյո՞ք այդ նվերն իրականում անհրաժեշտ է աղջկան, թե` ոչ: Առավել կարևոր են նվիրողի հույզերը, ուրախ մթնոլորտը, որում մատուցվում է նվերը, և այն կարևոր փաստի գիտակցումը, որ նա թանկ է տղամարդուն: Իսկ տղամարդիկ, ցավոք սրտի, հաճախ անտեսում են այդ ամենը:

Քեզ` մուշտակ, ինձ`շարժիչ

Տղամարդկանց մատուցած նվերների մեջ առանձնահատուկ տեղ են զբաղեցնում անհատական նկատառումներով արված նվերները: 
«Հեծանիվն իմ տարերքն է: Սակայն միայնակ քշելը ձանձրալի է ու տխուր. ընկերներիցս ոչ մեկ չի ցանկանում ինձ միանալ ու չի գնահատում իմ հոբբին: Ուստի ընկերուհիս, անկախ իր կամքից, դարձավ նաև իմ հավատարիմ ուղեկիցը հեծանվային զբոսանքների ժամանակ: Հերթական ծննդյան տոնի առթիվ ես նվիրեցի նրան գեղեցիկ, վարդագույն հեծանիվ: Սկզբում նա զարմացավ, սակայն հետո ներգրավվեց պրոցեսի մեջ: Արդյունքում` ես գոհացրի իմ սիրած աղջկան և լուծեցի միայնակ զբոսանքների խնդիրը»:

Ալեքս, 25տ.

«Երկար մտորումներից հետո ես կնոջս «Երազանքների գիրք» նվիրեցի. գեղեցիկ մատյան, որի մեջ կարելի է գրառել մտքեր, ցանկություններ, ֆանտազիաներ` ամեն ինչ: Կինս ուրախացավ այդ ռոմանտիկ նվերից և սկսեց պարտաճանաչ լրացնել մատյանը: Իսկ ես, ժամանակ առ ժամանակ, ծանոթանում եմ դրա պարունակությանը և համապատասխան քայլեր ձեռնարկում: Այժմ մեր ընտանիքում կատարյալ փոխըմբռնում է տիրում, թեև վերջին ժամանակները ես կասկածում եմ, որ կինս տեղյակ է իմ փոքրիկ խորամանկության մասին ու երկակի խաղ է վարում»:

Սամվել, 28տ.

Ըստ էության, ընտանեկան զույգերի մեջ լուրջ, արժեքավոր նվերները փոխանակման պես մի բան են: Չէ՞ որ, ծախսվում են ոչ թե անհատական, այլ ընդհանուր միջոցները: Օրինակ` կնոջը` մուշտակ կամ ադամանդներ, իսկ ամուսնուն` մեքենայի շարժիչ կամ նոր անվադողեր:

Ճիշտ մթնոլորտ

Նոր տարին բացառիկ շրջան է. ամանորյա նվերը պետք է լինի կատարյալ, խորապես հուզի ու հիացնի: Ինչպես Օ'Հենրիի հայտնի պատմվածքում, որտեղ աղջիկը կտրում և վաճառում է իր շքեղ մազերը` տղային ժամացույցի շղթա գնելու համար, իսկ տղան ստիպված է լինում հրաժարվել իր ժամացույցից` աղջկա համար գեղեցիկ մազակալ գնելու համար: Հուզիչ է, այնպես չէ՞:

Այսօր կյանքի պայմանները թույլ են տալիս չհրաժարվել սեփական իրերից` սիրելիին երջանկացնելու համար: Իսկ չսխալվելու համար օգնության են հասնում բազմաթիվ նվերային քարտերը, երբ աղջիկը որոշակի գումարի սահմաններում կարող է ինքնուրույն նվեր ընտրել: Բնականաբար, հիացմունքն ու ոգևորության զգացումն այդ դեպքում քիչ հավանական են:

Պետք է գտնել այնպիսի տարբերակ, որ նվերն ինքնին արտահայտի տղամարդու սերն ու նվիրվածությունը: Թող այն լինի անհեթեթ ու ծիծաղելի, սակայն` սրտից բխած: Այս դեպքերի համար հիանալի են ինքնուրույն պատրաստված, այսպես կոչված Handmade նվերները:

«Մի անգամ ծանոթներիցս մեկի տանը տեսա հետաքրքիր խոհանոցային տախտակ, որը պատրաստել էր տանտերն իր կնոջ համար և վրան փորագրել իր գրած բանաստեղծությունը. «Խոստանում եմ քեզ անվերջ սիրել ու համեղ ճաշեր քեզ պատրաստել, նվիրված և ուշադիր լինել, տան գործերը միշտ քեզ հետ կիսել»: Ի՜նչ խոսք, Սևակ չի, սակայն, իմ կարծիքով, դա հիանալի նվեր էր»:

Սաթենիկ, 27 տ.

Իրոք որ, եթե անգամ սեփական ուժերով պատրաստված նվերը չստացվի ինչպես հարկն է, աղջիկն իրեն, միևնույն է, երջանիկ ու սիրված կզգա:
Ի վերջո, պետք է հիշել մի շատ կարևոր հանգամանք: Ցանկացած, անգամ օծանելիքի պես կանխատեսելի նվերը կարող է հրաշալի դիտվել` համապատասխան ձևով մատուցվելու դեպքում: Խոսքը տիրող մթնոլորտի մասին է: Տղամարդկանց մեծ մասը շփոթվում է նվեր մատուցելիս. արագ հանձնում է, քթի տակ ինչ-որ բան ասում և վերջ: Կամ փորձում մատուցել իր նվերը անակնկալի ձևով, ինչը երբեմն ավելի վատ է:

«Իմ ծանոթներից մեկն իր կնոջ համար գեղեցիկ զգեստ էր գնել և որպես անակնկալ կախել նրա պահարանում: Մեկ շաբաթ անց` կնոջ անտարբերությունից ապշած ու վիրավորված, հարցրել էր նրան զգեստի մասին: Պարզվել էր, որ կինն առհասարակ այդ զգեստը չի նկատել. ամուսինն այն պահարանի խորքում էր կախել: Նախաձեռնությունը վատը չէ, սակայն անհաջող անակնկալը փչացրեց ամեն ինչ»:

Ալինա, 29տ.

Սիրելի՛ աղջիկներ, հուշեք ձեր տղաներին, որ նվերի մատուցման ձևը, տիրող մթնոլորտը ոչ պակաս կարևոր են, քան ինքը` ընծան: Համոզված կարող ենք հայտարարել, որ միշտ օգնում են գինին, մոմերն ու հաճելի երաժշտությունը: Շնորհավո՛ր Ամանոր:

cosmo.am