Երգչուհի Լիդուշիկի առաջիկա մենահամերգի մասին esyes.am-ն արդեն պատմել է: Իսկ մինչ այդ, պատանի երգչուհին այցելել է «Օրրան» բարեգործական կազմակերպություն ու շփվել այնտեղի երեխաների հետ: Լիդուշիկի խոսքերով՝ իր նախաձեռնությունը կարողացել է իրականացնել միայն օրերս, քանի որ հունիսի 1-ին հագեցած օր է ունեցել ու չի կարողացել այցելել երեխաներին, շնորհավորել նրանց տոնը:

Լիդուշիկի տատիկից՝ Գոհար Ավագյանից, ով նաև նրա պրոդյուսերական աշխատանքներով է զբաղվում, պարզեցինք, որ Լիդուշիկը երեխաների համար բացի քաղցրավենիքից, աղջիկների համար նաև մազակալներ ու հարդարման այլ պարագաներ է տարել: Իսկ «X մոլորակ» սրճարանն իր միջոցներով Լիդուշիկի մենահամերգի հրավիրատոմս է նվիրել նրանց:

«Լիդուշիկի որոշմամբ երկու տորթ էինք տարել՝ մեկն աղջիկների, մյուսը՝ տղաների համար,- ասաց երգչուհու պրոդյուսեր տատիկը և պատմեց «Օրրանում» ստացած տպավորությունների մասին,- երեխաները Լիդուշիկի հետ երգում էին նրա երգերը, պարում և ուրախանում. կարծես փոքրիկների դիսկոտեկում լինեինք»:

Երեխաների ջերմ ընդունելությունից ոգևորված Լիդուշիկը էլ դատարկաձեռն չի մնացել. «Օրրանի» սաները երգչուհու համար իրենց ձեռքով տիկնիկ էին պատրաստել: