Երգչուհի Լիլուն` Լիլիթ Ղուկասյանը չի ցանկանում խոսել երեկ իր մասնակցությամբ Հյուսիսային պողոտայում տեղի ունեցած միջադեպի մասին:  «Ամեն ինչ նորմալ է, հանգիստ եղեք, չեմ ուզում խոսեմ ոչ մի բանի մասին ընդհանրապես»,- նշեց նա:  Իսկ երեկ` լուրի հրապարակումից հետո, երբ զանգահարել էինք երգչուհուն` մեկնաբանություն ստանալու, նա հերքել էր, որ նման միջադեպ է եղել, որ իրեն ոստիկանություն են բերման ենթարկել եւ այլն: «Ոչ, ոչ, նման բան չկա»,- նշել էր նա: 

Հիշեցնենք, որ երեկ առավոտյան ուշագրավ դեպք է տեղի ունեցել Հյուսիսային պողոտայում եւ հարակից տարածքում: NEWS.am STYLE-ին ականատեսները պատմել են, որ վաղ առավոտյան ժամը 6-ի սահմաններում երկու երիտասարդ «Նիսան» մակնիշի մեքենայով` բարձր երաժշտությամբ ու բարձր արագությամբ, Հյուսիսային պողոտայով ու հարակից տարածքով վեր ու վար են արել՝ գրավելով մարդկանց ուշադրությունը: Մեր զրուցակիցը պատմել է որ նկատել է, որ Մաշտոցի պողոտայում նույն մեքենային ճանապարհային ոստիկանները կանգնեցրել են, պարզվել է՝ մեքենայի ղեկին կին է եղել, իսկ կողքի նստածը մի երիտասարդ: Երբ փորձել են կարգի հրավիրել, վերջիններս սկանդալ են սարքել, չեն ենթարկվել ոստիկաններին, ինչից դրդված նրանց բերման են ենթարկել Ոստիկանության Կենտրոնականի բաժին:

Ըստ մեր զրուցակցի ղեկին նստած աղջիկը երգչուհի Լիլուն է եղել: Լուրի հրապարակումից հետո Ոստիկանությունը հաղորդագրություն տարածեց` նշելով հետեւյալը.«Հոկտեմբերի 22-ին, ժամը 07.45-ին, ոստիկանության Երեւան քաղաքի վարչության ծառայողները Մաշտոցի պողոտայի թիվ 20 հասցեի մոտից բերման են ենթարկել Ղ. Լ.-ին եւ Կ. Պ.-ին: Նրանք, ըստ ոստիկանության պաշտոնական կայքի, այսօր «ժամը 06.00-ին, հասարակական կարգի կոպիտ խախտմամբ բացահայտ անհարգալից վերաբերմունք դրսեւորելով հասարակության նկատմամբ՝ «Նիսան» մակնիշի ավտոմեքենայում բարձր երաժշտություն միացրած՝ մեծ արագությամբ երթեւեկել են Հյուսիսային պողոտա, այնուհետեւ Տերյան եւ Ամիրյան փողոցով շարժվել դեպի Մաշտոցի պողոտա»: Ըստ ոստիկանության՝ իրենց արված դիտողությանը «Նիսանի» վարորդն ու ուղեւորը պատասխանել են հայհոյանքներով եւ չեն ենթարկվել նրանց օրինական պահանջներին:

Հանգամանքները պարզվում են: Կատարվում է հետաքննություն:

NEWS.am STYLE