Gangnam Style հիթի հեղինակ հարավկորեացի ռեփեր PSY-ն այցելել է Հարվարդի համալսարան և ուսանողների հետ հանդիպմանն իր անցյալի մասին բազմաթիվ զվարճալի պատմություններ պատմել։ Պարզվել է, որ նա վատ է սովորել, սակայն դա նրան չի խանգարել դառնալ համաշխարհային աստղ և նույնիսկ դիպչել Մադոննային, գրում է НТВ-ն:

Ելույթի սկզբում PSY-ն նշել է, որ իր ներկայությունը նման հեղինակավոր բուհում «այնքան տարօրինակ» է։ Նա նաև նշել է, որ հույս ունի կրկնել իր համար անսպասելի Gangnam Style-ի հաջողությունը։ Նրա կարծիքով՝ դա պատահականություն էր, իսկ պատահականություններ կյանքում «հաճախ չեն լինում»։

Մշտապես կատակելով՝ ռեփերը հիշել է Մադոննայի հետ ունեցած իր աշխատանքային փորձը։ PSY-ի խոսքով՝ համատեղ փորձից առաջ երգչուհին ապշեցրել է իրեն՝ հայտարարելով, որ նա բեմում կարող է դիպչել «իր մարմնի ցանկացած մասին»։