Խնամված ձեռքերը կնովջ միշտ վստահություն են հաղորդում իր, եւ գրավչություն՝ տղամարդու աչքերում։ Սակայն երբեմն գալիս է մի պահ, երբ դասական ֆրենչն այլեւս չի ուրախացնում, միագույն լաքը հոգնեցրել է, իսկ վառ գույներից ու նախշերից ձանձրացել եք դեռեւս պատանեկության տարիներին։ Հենց այս դեպքում էլ օգնության են հասնում մատնահարդարման նորույթները։

Թավշյա մանտահարդարումը եղունգի ձեւավորման վերջին նորույթներից է։ Թե ի՞նչ է այն եւ ինչպե՞ս են կիրառում ու անում,NEWS.am STYLE- ին պատմել է Maravilla գեղեցկության սրահի մասնագետ Կարինե Մուրադյանը.

«18-րդ դարում թավիշը կրում էին թագավորները, իսկ այժմ մատնահարդարման տեսքով այն կարող են «կրել» ամենանորաձեւ աղջիկները։ Այս թավիշը քաշմիրի բնական փոշի է, որը հատուկ սարքի միջոցով քսվում է եղունգին։ Առաջացած մագնիսական դաշտի շնորհիվ փոշին ամուր «նստում» է եղունգի մակերեսին։ Թավշյա մատնահարդարումն արվում է միայն բնական եղունգի վրա, հետեւյալ կերպ. սովորական մաքրումից հետո եղունգին քսվում է հիբրիդային գել-լաք, որը մոտ երկու շաբաթ չի մաքրվում եւ չի կորցնում խնամված տեսքը։ Դրա վրա սարքի միջոցով քսվում է քաշմիրի փոշին, որի գունապնակը բավականին հարուստ է՝ մոտ 20 երանգ։ Նման մատնահարդարումը խարամի (шлак) շնորհիվ եղունգը պաշտպանում է վնասվելուց։ Թավշյա եղունգը չի թափվում, չի քերծվում եւ կատարյալ տեսք է ունենում երկու շաբաթվա ընթացքում։ Սա հրաշալի լուծում է նրանց համար, ովքեր յուրաքանչյուր 3-4 օրը մեկ մատնահարարման գնալու ժամանակ ու ցանկություն չունեն, սակայն խնամած եղունգ ունենալու ցանկություն՝ ունեն»։

Ավելացնենք, որ թավշյա եղունգներն արժեն 18 հազար դրամ, արժեքի մեջ ներառված է նաեւ մաքրումը։ Իսկ եթե եղունգի թավշյա մակերեսը հեռացնելու ցանկություն կունենաք, ստիպված կլինեք կրկին այցելել սրահ, քանի որ ացետոնով այս գեղեցկությունը դուրս չի գա, դրա համար հատուկ հեղուկ կա։

Թավշյա եղունգներից «ազատվելը» ձեզ վրա կնստի եւս 2 հազար դրամ, պայմանով, որ կրկնակի մատնահարդարումն անվճար է։