Միգրենը գլխացավի ամենատարածված ձեւերից մեկն է: Պարբերաբար կրկնվող գլխացավերի մասին նշումների կարելի է հանդիպել դեռեւս Հիպոկրատի աշխատություններում: Այս հիվանդության բնույթն ու ընթացքն այնքան տարբեր է, որ բուժման մոտեցումներն էլ պետք է խիստ անհատական լինեն: Հաճախ մեկին օգնող միջոցները կարող են անօգուտ լինել մյուսի համար:

Բելգիացի գիտնականները սովորել են բուժել այն էլեկտրական խթանմամբ:

Հետազոտությանը մասնակցել է 67 մարդ: Մասնակիցներն ամիսը միջինում 4 անգամ ունենում էին միգրենի նոպաներ: Հետազոտության առաջին ամսվա ընթացքում նրանք բուժում չէին ստանում: Այնուհետև գիտնականները սկսեցին կիրառել էլեկտրական խթանումը: Խթանիչը տեղադրում էին հետազոտվողի ճակատին և ազդակներ էին հաղորդում վերակնակապճային նյարդին:

Հետազոտության մասնակիցներին բաժանել էին երկու խմբի: Մի խմբին երեք ամսվա ընթացքում ամեն օր կատարում էին էլեկտրական խթանում (օրական 20 րոպե): Խթանիչներ ամրացնում էին նաև մյուս խմբի անդամներին, սակայն այս դեպքում էլեկտրական խթաններն այնքան թույլ էին, որ չէին կարող ակնառու ազդեցություն թողնել:

Հետազոտության ավարտին այն մասնակիցների մոտ, ովքեր ստացել էին արդյունավետ խփանում, արձանագրվեց իննքազգացողության բարելավում: Օրերի միջին քանակը որոնց ընթացքում մասնակիցն ունենում էր միգրենի նոպա կրճատվեց ամիսը 6.9 օրից մինչև 4.8 օր: 

Հետազոտության ընթացքում կողմնակի ազդեցություններ չեն դիտվել:

''Էլեկտրական խթանման արդյունքում ստացված արդյունքները համարժեք են դեղորայքային բուժման դեպքում ստացված արդյունքներին, սակայն դեղորայքն ունի այնպիսի կողմնակի ազդեցություններ, որոնք երբեմն անհնարին են դարձնում դեղամիջոցի հետագա ընդունումը'',-պարզաբանում է հետազոտության հեղինակ Ջին Շոնեն Լիեժի համալսարանից (Բելգիա):

Իհարկե, մենք ձեզ չենք դրդում գլխացավի ժամանակ մատները մտցնել վարդակի մեջ, սակայն չի բացառվում, որ բուժման այդ մեթոդն ընդգրկվի ուղեցույցերում և դուք դառնաք առաջիններից մեկը, ով կօգտվի մեթոդից:


Աղբյուրը՝ Doctors.am