Ռուսաստանի մայրաքաղաք Մոսկվայում այսօր յուրօրինակ «բողոքի ակցիա» է տեղի ունեցել. գրեթե ամբողջովին մերկ տղամարդը կանգնել է Ռուսաստանի Ջրօդերևութաբանական գիտահետազոտական կենտրոնի շենքի մոտ և տաք ու արևոտ եղանակ պահանջել:

Ինչպես հաղորդում է ռուսական Ntv.ru կայքը, արևային ակնոցով տղամարդու  հագին միայն կիսավարտիք է եղել, ձախ ձեռքին՝ «Երանի ամառը շուտ գար» գրությամբ պաստառ, աջին՝  հյութով լի բաժակ:

Թե ինչով է ավարտվել միանձնյա պիկետը, չի հաղորդվում: «Միջադեպի» մասին ռուսական լրատվամիջոցները տեղեկացել են Twitter միկրոբլոգների կայքից. տղամարդու լուսանկարն իր միկրոբլոգում է տեղադրել @tsitsurskaya անունով օգտատերը:

Ավելացնենք միայն, որ Ռուսաստանում նույնիսկ գարունը չի շտապում մտնել իր իրավունքների մեջ. օդերևութաբանների կանխատեսումների համաձայն՝ առաջիկա օրերին Մոսկվայում ձյան տեղոււմներ են սպասվում,  իսկ օդի ջերմաստիճանը մինչև շաբաթվա վերջ կտատանվի -7-ից  -9 աստիճանի սահմաններում: