Ինչպես ավելի վաղ հայտնել էր ֆոտոլրագրող Գագիկ Շամշյանը, երեկ՝ մարտի 19-ին, ավտովթար էր տեղի ունեցել Արարատի մարզում: Ժամը 21:30-ի սահմաններում Արարատի մարզի Սուրենավան գյուղի բնակիչ, 51-ամյա Վարդգես Ղազարյանը, վարելով «Լադա Պրիորա» մակնիշի՝ 285 LL 26 համարանիշի ավտոմեքենան, Երևան-Երասխավան ավտոճանապարհի Շահումյան գյուղի վարչական տարածքում դուրս էր եկել երթևեկելի գոտուց և գլխիվայր շրջվել: 

Ֆոտոլրագրողը հայտնում է, որ ոստիկանության քննչական գլխավոր վարչության Արարատի մարզի քննչական բաժնի Արտաշատի քննչական բաժանմունքում նյութեր են նախապատրաստվում երեկ՝ մարտի 19-ին, Արարատի մարզում տեղի ունեցած մահվան ելքով ավտովթարի փաստով: 

Ֆոտոլրագրողը հայտնում է, որ, ըստ տեղեկությունների, երեկ՝ ժամը 21:30-ին, Սուրենավանի գյուղապետը Արարատի մարզի մեծ թվով գյուղապետերի հետ մասնակցելիս է եղել խնջույքի, որը տեղի էր ունեցել Արարատի մարզպետ Էդիկ Բարսեղյանին պատկանող Ռենեսանս ռեստորոնային համալիրում և խնջույքից որոշ ժամանակ անց Սուրենավանի գյուղապետը դուրս է եկել այնտեղից և ճանապարհվել տուն, սակայն տեղի է ունեցել ողբերգական ավտովթարը,–այս մասին հաղորդում է shamshyan.com կայքը: 

Ինչպես վթարի վայրից հայտնել էր ֆոտոլրագրող Գագիկ Շամշյանը, վարորդը մարմնական վնասվածքներով տեղափոխվել էր Արտաշատի բժշկական կենտրոն, որտեղ մահացել է: 

Դեպքի վայր էին ժամանել ՀՀ Արտակարգ Իրավիճակների նախարարության Փրկարար ծառայության Արտաշատի հրշեջ փրկարարական ջոկատը՝ 1 մարտական հաշվարկով՝ հրամանատարի տեղակալ Լևոն Միրզոյանի գլխավորությամբ: 

Տեղում էր նաև Ոստիկանության Արտաշատի բաժնի օպերատիվ քննչական խումբը: 

Ժամանել էին Ճանապարհային ոստիկանության 2–րդ սպայական գումարտակի 1-ին վաշտի 2-րդ դասակի աշխատակիցները՝ վաշտի հրամանատար Տիգրան Գրիգորյանի և դասակի հրամանատար Սանասար Հարությունյանի գլխավորությամբ: 

Գագիկ Շամշյանը հայտնել էր, որ մահացածը Սուրենավան գյուղի գյուղապետն է, իսկ ավտոմեքենան էլ հաշվառված է գյուղապետարանի հաշվեկշռում:

Քիչ առաջ ֆոտոլրագրողը հայտնեց, որ դեպքի վայր էր ժամանել Ճանապարհային ոստիկանության 2-րդ սպայական գումարտակի հրամանատար Սուրեն Խուդոյանը:

Լուսանկարները՝ Գագիկ Շամշյանի

shamshyan.com