Ռուսաստանի Սարատովի երկրամասի Ռտիշչեւ քաղաքի բնակիչները փրկել են նորածնի, որը 12 ժամ մնացել էր լճակի ափին, աղբով լցված պոլիէթիլենե տոպրակի մեջ:

Պարզվել է, որ նորածինն ավելի քան 12 ժամ մնացել է տոպրակի մեջ՝ ծխախոտի մնացուկների, օգտագործված զուգարանի թղթի, սննդային մնացորդների եւ այլ աղբի հետ, հաղորդում է Life News-ը:

Տեղացիները լաց են լսել եւ ոստիկանների կանչել: Իրավապահները երեխային ծննդատուն են տարել, որտեղ նրան բուժօգնություն է ցուցաբերվել: 1,9 կգ քաշով երեխան բացարձակ առողջ է եղել:

Ոստիկանները քննություն են իրականացրել եւ պարզել մոր ինքնությունը՝ 31-ամյա Մարինա Բուրավլեւա: Կինը ոստիկաններին հայտարարել է, թե երեխային մեռած է ունեցել, ուստի դեն է շպրտել: Իսկ ծանոթների հարցերին՝ մեծացող փորի մասին, նա պատասխանում էր, թե հղի չէ, այլ գիրացել է: