Սիրիայի կառավարական ուժերը ռմբակոծության են ենթարկում մայրաքաղաք Դամասկոսի որոշ հատվածներ, ինչպես նաև՝ Հոմս և Դեիր Իզոր քաղաքները։

Կառավարական և ապստամբ ուժերի միջև բախումներ են գրանցվել նաև Հալեպ քաղաքի մոտակայքում։

Ապստամբ ուժերը տեղեկացնում են, որ կիրակի օրը գրավել են Հալեպից հյուսիս գտնվող սահմանային անցման կետը։ Դրանից մի քանի օր առաջ նրանք իրենց վերահսկողությունն էին հաստատել դեպի Թուրքիա տանող մեկ այլ անցակետում։ 

Թուրքիայում պաշտոնապես գրանցվել է Սիրիայից 43 հազար փախստական, սակայն մեծ թվով փախստականներ էլ անցել են սահմանը առանց որևէ տեղ գրանցվելու։

ՄԱԿ-ի հաշվարկներով, հինգշաբթի օրվանից ի վեր միայն Լիբանան է մուտք գործել սիրիացի 30 հազար փախստական։ Օդային ուղիներով Իրաք է ժամանել 1000 սիրիացի, մի քանի հազար մարդ էլ սահմանը հատել է ցամաքային ուղով։

Ռուսաստանի ու Չինաստանի կողմից վետոյի ենթարկվելու արդյունքում Սիրիայի դեմ Արեևմուտքի և արաբական երկրների աջակցությամբ ՄԱԿ-ի Անվտանգության խորհրդի պատժամիջոցներն անցնող շաբաթ ևս մեկ անգամ չկարողացան մտնել ուժի մեջ։

Սիրիայի պետական հեռուստատեսությունը ցուցադրել է նախագահ Բաշար ալ Ասադի և բանակի նոր հրամանատարի միջև հանդիպման մասին պատկերներ։ Սակայն նախկին հրամանատարի սպանությունից հետո Ասադն այլևս հաճախ չի երեևում հեռուստատեսությամբ։ Անհայտ է մնում նաև նրա գտնվելու վայրը, ինչը խոսում է այն մասին, որ իր իշխանության ներքին օղակի 4 անդամների սպանությունից հետո նրա դիրքերը նկատելիորեն թուլացել են,- հայտնում է ''Ամերիկայի ձայն''-ը։

mamul.am