Երգչուհի Սիրուշոն ներկայացրել է իր երգի, տեսահոլավկի ստեղծման պատմությունը, իր զգացողությունները, մոտեցումները եւ այլ մանրամասներ: Այս մասին նա գրել է «Ֆեյսբուքի» իր էջում:

«Այս աշխատանքի ստեղծման ողջ ընթացքը կարծես մի մեծ ճանապարհորդություն լիներ, որի մանրամասները եւ իմ զգացողությունները փորձել եմ գրի առնել: Այն ամբողջությամբ կներկայացնեմ ձեզ մոտ օրերս: Այն պատմում է երգի,տեսահոլովակի եւ իմ մոտեցման մասին, թե ինչպես ստեղծվեցին գաղափարները եւ ինչպես իրականացան, ինչ եմ ցանկացել փոխանցել հանդիսատեսին եւ ինչու: Այս պահին ձեզ եմ ներկայացնում վերը նշվածի առաջին հատվածը, որը պատմում է երգի ստեղծման մասին..»,- գրել է նա եւ ներկայացրել մանրամասներ:

«Կյանքը մեզ ամեն քայլափոխի տալիս է ոգեշնչվելու հնարավորություն, պարզապես պետք է նկատել այդ պահերը: Երբ փոքր էի շատ չէի լսում ժողովրդական երաժշտություն, իսկ ժողովրդական երգերին ծանոթ էի մորս եւ նրա կոլեգաների կատարումներից: Երբ հորս խորհրդով սկսեցի ձայնագրել Շերամի երգերը ինքս ինձ համար բացահայտեցի, թե որքան իմն է այն: Քանի որ փոքր տարիքից ստեղծագործում էի ժամանակակից ոճում, որոշեցի ինձ երկու հարազատ ժանրերը համատեղել: Վերջերս, երբ Կոմիտաս էի լսում, «Լոռվա Գութաներգ»–ի մեջ ինձ մի հատված այնքան ոգեշնչեց, որ մի ակնթարթում մտովի լսեցի իմ նոր վերջնական երգը եւ պատկերացրեցի տեսահոլովակը: Հիմա պետք էր այս ամենը հերթականությամբ իրականացնել, իսկ ինձ մոտ այդ հերթականությունը չի սահմանափակվում գործիքավորում, խոսքեր եւ ձայնագրում պրոցեսով: Սկսեցի ուսումնասիրել «Լոռվա Գութաներգ»–ի հետ կապված գրեթե բոլոր նյութերը, ընթերցեցի Կոմիտասի գրած վերլուծությունը այս երգի շուրջ, հանդիպեցի մարդկանց, ովքեր քաջածանոթ են վարպետի ստեղծագործություններին եւ դրանց ծագմանը: Մասնագետների, ովքեր առհասարակ դեմ են Կոմիտասի երաժշտության ժամանակակից ներկայացմանը եւ փորձեցի հասկանալ ինչու: Չնայած նրան, որ չէի պատրաստվում նորովի ներկայացնել Կոմիտասի աշխատանքը, այլ այն ուղղակի իմ ոգեշնչման աղբյուրն էր հանդիսացել` ամեն դեպքում ինձ համար շատ կարեւոր էին բոլոր ուսումնասիրություններս:

«Լոռվա Գութաներգ»- ում նկարագրվում է, թե ինչպես է հողի մշակը իր երգով ոգեւորում Գոմեշին, գութանը կապած լծին հողն է հերկում: Այս թեման հայերի մեջ ունեցել է մեծ համարում, փառաբանվել ու գովերգվել հորովելներում եւ ժողովրդական այլ ստեղծագործություններում:

Երգիս երաժշտությունը եւ ռիթմը աշխարհի այսօրվա զարկերակի եւ հեռվի արտահայտումն է: Որքան էլ մոտ լինեմ արմատներիս չեմ ուզում անտեսել այն ժամանակը եւ իրականությունը որի մեջ ապրում եմ: Եթե անգամ այն անվանենք ակումբային,պարային, ապա ես այսպիսին եմ պատկերացնում հայկական ակումբային երաժշտությունը, որ որքան էլ ժամանակակից լինի` հիմնված լինի հայկական հիմքերի վրա եւ ասելիք ունենա:

Երգի խոսքերն այս դեպքում ինձ համար հատկապես կարեւոր էին, քանի որ ասելիք ունեի,այնքան շատ ասելիք, որ միտքս խոսքիս հերթ չեր տալիս, հասկացա որ ինձ հետ գաղափարս կարող էր կիսել եւ միտքս ճիշտ տեղ հասցնել միայն իմ տաղանդավոր ընկեր՝ Ավետ Բարսեղյանը:

Խոսքս տեղ հասցնելու համար ինձ պետք է օգներ երգիս հերոսը՝ գոմեշը: Գոմեշը, որը խորհրդանիշ է աշխատասիրության, որը համառ եւ համբերատար իր ուսերին է կրել իր բեռը: Այսօր աշխարհը լի է վայրագությամբ, չարությամբ, արժեքներ ու արժանապատվություն կորցրած բազմերեսանի մարդկանցով: Իմ երգն իմ բողոքն է այս ամենի դեմ եւ գովաբանումն է այն մարդու, ով ազնիվ ու արդար է ինքն իր առջեւ ու իր քայլերի մեջ, ով ինչպես երգիս հերոսը լուռ եւ պատվով իր բեռն է տանում ու երբեք չի բողոքում ու չի հանձնվում. նա հերոս է…»,- գրել է երգչուհին:

Նշենք, որ երգչուհի Սիրուշոյի նոր` «ՊռեԳոմեշ» երգը արդեն հասանելի է: Առաջիկայում նա կներկայացնի նաեւ երգի տեսահոլովակը:

NEWS.am