 Նյու Յորքի 25-ամյա ոստիկան Լոուրենս Դեպրիմոն, որն անհանգստացած անտուն ամերիկացու ճակատագրով` նրա համար կոշիկ էր գնել ու ծնկել նրա առաջ` այն հագցնելու, համացանցում մեծ ճանաչում է ձեռք բերել. մի քանի օրում նրա լուսանկարը դիտել է Facebook-ի 1.6 մլն օգտատեր, հայտնում է LifeNews-ը: Հիշեցնենք, երիտասարդ ոստիկանը մոտեցել ու հարցրել էր, թե ինչ համարի կոշիկ է հագնում թափառաշրջիկը: Վերջինս անմիջապես չէր պատասխանել, քանի որ չէր հավատացել լսածին: Երիտասարդն անգամ չէր կարող ենթադրել, որ մի քանի օրում կդառնա ինտերնետի աստղ և գովասանքի տեսքով միլիոնավոր մեկնաբանություններ կստանա անծանոթ մարդկանցից: Բարեգթության գործողությունը կարող էր աննկատ մնալ ու մոռացվել, եթե չլիներ Արիզոնայից մի զբոսաշրջիկ, որը լուսանկարել է հուզիչ պահը և լուսանկարը նոյեմբերի 14-ին տեղադրել Facebook-ում` Նյու Յորքի ոստիկանության էջում: Այդպիսով` ոստիկան Լոուրենս Դեպրիմոն մեկ գիշերում դարձել է համացանցի հերոս: Ոստիկանության ղեկավարությունը հիացած է իր աշխատակցի արարքով ու նրան շնորհակալություն է հայտել մերձավորի հանդեպ կարեկցության համար: «Ինձ ապշեցրել էր այն, որ անտուն տղամարդը բոբիկ էր այդ սառը եղանակին: Նա անգամ գուլպաներ չուներ ոտքերին: Ես պարզապես չէի կարող նրա կողքով անտարբեր անցնել»,- ասել է Լոուրենս Դեպրիմոն:  1in.am
|
